بێ ڕەزامەندی ژینگە هیچ پاڵاوگەیەک مووڵەتی پێ نادرێت

پەیامی کورد    ...   بێ ڕەزامەندی ژینگە هیچ پاڵاوگەیەک مووڵەتی پێ نادرێت

بەڕێوبەری فەرمانگەی کاروباری ھونەری لە دەستەی ژینگەی ھەرێمی کوردستان ڕایدەگەێنێت، زۆرینەی پاڵاوگە نایاساییەكان داخراون و ھەر پاڵاوگەیەک بیەوێت دامەزرێت و مووڵەت وەربگرێت، پێویستە ڕەزامەندی لە نۆ شوێن وەربگرێت، ئەگەر نا ناتوانێت مووڵەتی پێ بدرێت.

ئازاد نووری عەوڵا، بەڕێوبەری فەرمانگەی کاروباری ھونەری لە دەستەی ژینگەی ھەرێمی کوردستان، لە لێدوانێكی تایبەتدا ڕایگەیاند: لە پارێزگای ھەولێر کۆمەڵێک پاڵاوگەی نایاسایی داخراون، بەھۆی پابەندنەبوون بە ڕێنماییەکان، چوونکە بەپێی ڕێنمایی ژمارە یەکی ساڵی ٢٠٢٠ی وەزارەتی سامانە سرووشتییەکان، پێویستە بۆ وەرگرتنی مووڵەت پاش سامانە سرووشییەكان، ڕەزامەندی وەزارەتی شارەوانی و گەشتوگوزار، دەستەی ژینگە، کارەبا و چەند شوێنێکی دیکە وەربگرێت، چوونکە ناتوانن بە ئاسانی مووڵەت وەربگرن و زیان بە ژینگە بگات.

ئەوەشی ووت : ئەو پاڵاوگانەی ئێستا هەن، پێویستە مووڵەتەكانیان نوێ بکەنەوە و ڕێنماییەکان جێبەجێ بکەن، ئەمەش وای كردووە ئێستا زۆرینەی پاڵاوگەکان نەماون و داخراون و ڕێژەیەکی کەمیان ماوە.

ئازاد نووری عەوڵا ڕوونیشیكردەوە: پێشتر ئەو پاڵاوگانە بەھۆی ئەوەی ڕێگەی ھاوردەکردنی سووتەمەنی کەم بوو پێویستمان پێی ھەبوو، بە مەرجی كەمتر دانرابوون، بەڵام ئێستا بەنزین و سووتەمەنی ھەیە و پێویست ناکات ئەو جۆرە پاڵاوگانە كە ڕەچاوی مەرجەكان ناكەن بمێنن.

بەڕێوبەری فەرمانگەی کاروباری ھونەری لە دەستەی ژینگە جەختیش دەکاتەوە: بەردەوام کار دەكەین بۆ ئەوەی پاڵاوگەی نایاسایی نەمێنێت و دابخرێن، ھەر لەو ماوەیەدا نزیکەی حەوت پاڵاوگەی دیکە داخران.