ئەردۆغان: شاری مەڕەش زۆرترین زیانی بەركەوتووە

پەیامی کورد... ئەردۆغان: شاری مەڕەش زۆرترین زیانی بەركەوتووە

ڕەجەب تەیب ئەردۆغان بۆ بەسەركردنەوەی ناوچە بوومەلەرزە لێدراوەكان گەیشتە شاری مەڕەشی باكووری كوردستان و ڕایگەیاند شاری مەڕەش زۆرترین زیانی بەركەوتووە .

ڕەجەب تەیب ئەردۆغان سەرۆكی توركیا لە گوتارێكدا لە مەڕەش ئاماژەی بەوەدا: هاووڵاتیانی لێقەوماو و بوومەلەرزە لێدراو دەتوانن بچنە شارەكانی ئالانیا، ئەنتالیا و مێرسین لەباشووری توركیا لەوێ نیشتەجێببن، چونكە ڕێككەوتن لەگەڵ خاوەنی هۆتێل و مۆتێلی شارەكان كراوە لێقەوماوان لەوێ بمێننەوە، خواردن و خواردنەوەش بۆ لێقەوماوان دابیندەكەن.

باسی لەوەشكرد: ڕێگانادەین هیچ كەس و خێزانێك بێ شوێنی نیشتەجێبوون بمێنێتەوە، لە تەواوی شارەكان ناوەندی تایبەت كراونەتەوە، هاوكاری هاووڵاتیان دەكەن.

ڕاشیگەیاند: ئەمڕۆ ڕۆژی هاوكارییە، ڕۆژی پێكەوەییە، هەموو چووینە باری نائاساییەوە، زیانەكان بخەمڵێنین، لە داراییەوە بوودجەمان دابینكردووە، هاوكاری هاووڵاتیان دەكەین، بۆ هەر خێزانێك هاوكاری دابیندەكەین.

ڕوونیشی كردەوە: ژمارەی گیان لەدەستدان گەیشتووەتە 8.574 كەس و بریندارانیش 49 هەزار كەسی تێپەڕكردووە.

لەكۆتایشدا ووتی: میللەتی ئێمە میلەتێكی ئارامگر و خۆڕاگرە.