كۆشكی سپی تیكتۆكی قەدەغەكرد

پەیامی کورد... كۆشكی سپی تیكتۆكی قەدەغەكرد


کۆشکی سپی، فەرمانی بە دەزگا فیدراڵییەکان کرد لە ماوەی 30 رۆژدا ئەپلیکەیشنی تیکتۆک لەسەر مۆبایل و ئامێرەکانیان قەدەغەبکەن و بە مەترسیدار ناویدەبات.

سەرۆکایەتیی ئەمەریکا دەڵێت، نووسینگەی بەڕێوەبردن و بودجە لە کۆشکی سپی، فەرمانی بە سەرجەم وەزارەت و دەزگاکانی سەر بە حكومەتی فیدراڵی كردووە لە ماوەی 30 رۆژدا بڕیاری قەدەغەکردنی تیكتۆك جێبەجێبکەن، كە کۆنگرێس لە کۆتایی مانگی کانوونی یەكەمی ساڵی رابردوودا بە یاسا پەسەندیكرد و لە سەرەتای ئەمساڵدا جۆ بایدن سەرۆكی ئەمریكا خستیەڕوو.

بەپێی یاساكە، دابەزاندنی ئەپلیكەیشنی تیكتۆك لەسەر ئامێر و مۆبایلەكانی سەر بە حکومەتی ئەمریكا قەدەغەكراوە.

شالاندا یۆنگ بەڕێوەبەری فەرمانگەی بەڕێوەبردن و بودجە لە کۆشکی سپی، نووسراوێکی ئاراسته‌ی ده‌زگاكانی حكومه‌ت كردووه‌ بۆ ئەوەی لە گشت دەزگا و بەشە جیاوازەکانی حکومەتدا ئه‌پلیكه‌یشنی تیكتۆك لەسەر هەموو ئامێرەكانیان لاببه‌ن و ناشبێت بە ئینتەرنێتەوە پەیوەستبكرێت.

پێش ئەمریكا، كەنەدا و یەكێتیی ئەوروپا بوونی ئه‌پلیكه‌یشنی “تیكتۆك”ـیان لەسەر ئامێرەکانی دەزگا فەرمییەكانیان قەدەغەکرد و هۆكارەكەی دەگەڕێننەوە بۆ ئەوەی كە ئه‌پلیكه‌یشنە چینییەكە، مەترسیی لەسەر تایبەتمەندێتی و ئاسایش هەیە.