كار بۆ رێكخستنەوەی كەرتی دەرمان دەكرێت و دكتۆر محەمەد حاجی بەرپرسیاریەتی دەزگای نیشتیمانی دەرمان وەردەگرێت

پەیامی کورد      ...   كار بۆ رێكخستنەوەی كەرتی دەرمان دەكرێت و دكتۆر محەمەد حاجی بەرپرسیاریەتی دەزگای نیشتیمانی دەرمان وەردەگرێت

دوای دەست بەكاربوونی كابینەی نوێی حكوومەتی ھەرێمی كوردستان، كار بۆ رێكخستنەوەی كەرتی دەرمان دەكرێت و سەرۆكی لیژنەی تەندرووستییش لە پەرلەمانی كوردستان ئاشكرای كرد، سەرۆكایەتی ئەنجوومەنی وەزیران سەرقاڵی دامەزراندنی دەزگایەكی نیشتیمانی دەرمانە.

د. سەباح زێباری، سەرۆكی لیژنەی تەندرووستی لە پەرلەمانی كوردستان، رایگەیاند: "پێشتر لیژنەیەكی لاوەكی لەلایەن پەرلەمانی كوردستانەوە پێك ھاتبوو و بەدواداچوونی تەواوی بۆ كێشەی دەرمان كردووە لە ھەرێمی كوردستان و راسپاردەكانیش ئاراستەی سەرۆكایەتیی ئەنجوومەنی وەزیران كراون، بۆ ئەوەی كێشەی كەرتی دەرمان لە ھەرێمی كوردستان كۆنتڕۆڵ و چارەسەر بكرێت".

سەرۆكی لیژنەی تەندرووستی ئاماژەی بۆ ئەوەش كرد: "سەرۆكایەتی ئەنجوومەنی وەزیران سەرقاڵی دامەزراندنی دەزگای نیشتیمانی خۆراك و دەرمانە و دكتۆر موحەمەد حاجی وەك یاریدەدەری سەرۆكی حكوومەت بۆ كاروباری دەرمان، بەرپرسیاریەتی دەزگاكە وەر دەگرێت".

زێباری دەشڵێت: "ھەموو ھەوڵێك بۆ باشكردنی ڕەوشی تەندرووستی و كەرتی دەرمان دەدرێت لە پێناو سەلامەتی ھاووڵاتیاندا، بە تایبەتی لە ئێستادا بە ھۆی ڤیرووسی كۆرۆناوە رەوشەكە پێویستی بە پێداچوونەوە ھەیە".