لە ساڵێکدا ١٥٠ منداڵ لە شەقامەکانی سلێمانی دوور خراونەتەوە

پەیامی کورد... لە ساڵێکدا١٥٠ منداڵ لە شەقامەکانی سلێمانیدوور خراونەتەوە

قایمقامیەتی سلێمانی ڕای دەگەیێنێت، تەنیا ساڵی ڕابردوو ١٥٠ منداڵیان لەسەر شەقامەکان دوور خستووەتەوە و داواش لە ڕێکخراوەکان دەکەن هاوکاریان بن.

قایمقامیەتی سلێمانی بڵاوی کردەوە، لە ڕێگەی لیژنەیەکی تایبەتەوە و بە هاوکاری ڕێکخراوی منداڵ پارێزیی کوردستان کار بۆ نەهێشتنی دیاردەی منداڵانی ئیشکەری سەرشەقامەکان دەکەن و لەڕێگەی یاسایەوە خێزانەکانیان پابەندی پاراستنی مافی منداڵەکان دەکات.

ئاماژەشیان بەوە کرد: لە کۆبوونەوەی لەگەڵ لیژنەی پاراستنی منداڵ ئاوات محەممەد قایمقامی سلێمانی ئاماژەی بەوە کردووە، ئەو لیژنەیە لە ماوەی چەند ساڵی ڕابردوودا کاری زۆر باشی کردووە بۆ نەهێشتنی کارکردن و دەرۆزەکردنی منداڵ کەلەلایەن خێزانەکانیانەوە بەکار دەهێنرێن.

‎وتیشی چەند جارێک لەسەر ئەم بابەتە کۆبوونەوەیان کردووە و لایەنە پەیوەندیدارەکانی حکومەت و ڕێکخراوە ناوخۆیی و جیهانییە ناحکومییەکانمان بەشداری پێکردووە و داوامان لێکردوون لەگەڵمان هاوکار بن بۆ ئەوەی ڕێگە بگرین لە پێشێلکردنی مافی ئەو منداڵانە، بەڵام لەگەڵیان هاوکار نەبوون و وەکوو پێویست نەهاتوونەتە پێشەوە، بۆیە داوا دەکەن بەتایبەت ڕێکخراوە مرۆڤدۆستەکان لەگەڵیان هاوکار بن.

‎قایمقامی سلێمانی جەختی لەوەش کردووەتەوە، بەشی زۆری ئەو منداڵانە ئاوارەکانی سووریا و ناوەڕاستی عێراقن و پابەندی کولتوور و یاساکانی ئێرە نابن، ترسیان لەوەیە خێزان و منداڵەکانی ناوخۆی شارەکان تێکەڵ بەم ئیشە ببن کە لەرووی کلتورییەوە بە ئێمە نامۆیە.

‎لای خۆشیەوە بەختیار غەفوور نوێنەری منداڵپارێزی کوردستان و سەرۆکی لیژنەی پاراستنی منداڵ لە لیژنە هاوبەشەکان وتویەتی، تەنیا لە ساڵی ڕابردوودا لە شاری سلێمانی ١٥٠ منداڵیان لەسەر شەقامەکان کۆ کردووەتەوە و خێزانەکانیان دۆزیونەتەوە، فۆرمی زانیاری و بەڵێننامەی یاساییان پێ پڕکراوەتەوە کە بە هیچ جۆرێک کار بەو منداڵانە نەکرێت، لە کاتی پابەند نەبوونییان لەڕێگەی یاسا و داواکاری گشتییەوە خێزانی منداڵەکە بە بەندکردن یاخود سزای دارایی سزا دەدڕێن.