عێراق غاز لە قەتەر دەکڕێت

پەیامی کورد... عێراق غاز لە قەتەر دەکڕێت

بۆ پڕکردنەوەی کەمیی غازی سروشتی، عێراق یەک ملیۆن و ٥٠٠ هەزار تۆن غاز لە قەتەرەوە هاوردە دەکات و دەڵێت، غاز بەشی وێستگەکانی کارەبا ناکات و کورتهێنانێکی زۆر هەیە.

عێراق دەیەوێت ئەو بڕە لە غاز ساڵانە هاوردە بکات بەبێ ئەوەی دیاری بکات تا چەند ساڵی تر پێویستی بە هاوردەکردنی غازە و کەی غازی ناوخۆ دەگات بە ڕادەی پڕکردنەوەی پێداویستیی ناوخۆ، ئەو غازەی هاوردە دەکرێت تەنیا بۆ پڕکردنەوەی بۆشایی و کورتهێنانی سووتەمەنیی وێستگەکانی کارەبایە، نەک بۆ پێداویستی و بواری دیکەی وەک پیشەسازی و گەرمکردنەوە.

ئەحمەد مووسا عەبادی وتەبێژی وەزارەتی کارەبای عێراق ئەمڕۆ پێنجشەممە ڕایگەیاند، بۆ هاوردەکردنی غاز لە قەتەر عێراق پێویستی بە دروستکردنی بەندەر و سەکۆی غاز و ئامادەکردنی تۆڕی بۆرییە بۆ گواستنەوەی غازەکە لە بەندەرەکانەوە بۆ وێستگەکانی کارەبا.

بەپێی وتەی عەبادی، تەواوکردنی ئەو پرۆسەیە لەنێوان ١٢ بۆ ١٥ مانگی پێویستە و «ئەوەش ماوەیەکی زۆر دوور و درێژە»، چونکە ئێستا عێراق پێویستییەکی زۆری بە غازە، بۆیە مستەفا کازمی سەرۆک وەزیران فەرمانی کردووە هەموو وەزارەتە پەیوەندیدارەکان ئەوپەڕی توانا و هەوڵەکانیان بەگەڕبخەن بۆ ئەوەی لە ماوەی هەشت مانگدا غازی قەتەر بکات بە عێراق.

بڕیارەکەی حکومەتی عێراق لە کاتێکدایە، هەوڵێک هەیە لەڕێگەی هەرێمی کوردستانەوە غاز هەناردەی دەرەوە بکرێت.