پیسبوونی هەوا ساڵانە گیانی ٧ میلیۆن کەس دەگرێت

پەیامی کورد … پیسبوونی هەوا ساڵانە گیانی ٧ میلیۆن کەس دەگرێت

دوای 16 ساڵ رێکخراوی تەندروستیی جهانی گۆڕانکاری بەسەر رێنماییەکانی رێگری لە پیسبوونی هەوادا هێنا و ئاماژەی بەوەشکرد، ساڵانە بەهۆی پیسبوونی هەواوەوە نزیکە حەوت ملیۆن کەس گیان لەدەست دەدەن.

لە راگەیەنراوێکدا رێکخراوی تەندروستیی جیهانی باسی لەوەکردووە، پیسبوونی هەوا و بوونی گازە ژەهراوییەکان لە هەوادا، هاوشێوەی جگەرەکێشان و خۆراکی ناتەندروست زیان بە مرۆڤەکان دەگەیەنن.

روونیشیکردوەتەوە، پیسبوونی هەوا بووەتە یەکێک لە هۆکارە سەرەکیەکانی گیان لەدەستدانی مرۆڤەکان و ساڵانە بەهۆیەوە نزیکەی حەوت ملیۆن کەس گیان لەدەستدەدەن.

تەندروستیی جیهانی ئاماژەی بەوەشکردووە، لە پێناو رزگارکردنی گیانی مرۆڤەکان رێنماییەکانی تایبەت بە رێگریی لە پیسبوونی هەوایان توندتر کردوەتەوە و حکومەتەکان پێویستە بەو رێنماییانەوە پابەندبن.

بە گوێرەی رێنماییەکە، هێڵی سووری بوونی گازە ژەهراوییەکان لە هەوادا دابەزێنراوە، ئەمەش بۆ ئەوەی زووتر هەست بە مەترسی بکرێت و رێوشوێنی پێویست بۆ سنوردارکردنی ئەو چالاکیە پیشەسازیی و مرۆییانە بگیرێتەبەر کە هۆکاری پیسبوونی هەوان.

دوایین جار لە ساڵی 2005دا تەندروستیی جیهان رێنماییەکانی تایبەت بە رێگریی لە پیسبوونی هەوا و پێوەرەکانی پیسبوونی هەوای بڵاوکردبوەوە.