سەرۆکی هوداپار ... بارزانی ڕۆڵێکی گرینگ و بەرچاوی لە ئارامی ناوچەکەدا هەیە

پەیامی کورد  ...   سەرۆکی گشتی هوداپار (HUDA par) ڕایگەیاند، ئامانجیان لە کردنەوەی نوێنەراتییان لە هەرێم، پتەوکردنی پەیوەندییەکانیانە لەگەڵ هەرێمی کوردستان بۆ ئەوەی لە هەموو ڕوویەکەوە هاوکاری و هاوئاهەنگی لە نێوانیاندا هەبێت.

پێش ماوەیەک لە سەلاحەددین، سەرۆك مەسعوود بارزانی پێشوازی لە شاندێكی باڵای هوداپار بە سەرۆكایەتی ئیسحاق ساغلام، سەرۆكی گشتی هوداپار و جێگر و ژمارەیەك لە ئەندامانی شەوورای ناوەندی ئەو حزبە كرد.

ئیسحاق ساغلام،  رایگەیاند : "دیداری یەکەم نییە لەگەڵ سەرۆک بارزانی دەکەین، لە هەموو دیدارەکانماندا بە گەرمی لە لایەن سەرۆک بارزانییەوە پێشوازیمان لێ کراوە، ئەو دیدارانە لە هەموو ڕوویەکەوە ئەرێنی بوون و بۆ باس لە چەندین پرسی گرێدراو بە کورد و ناوچەکەوە بوون."

ساغلام ئاماژەیشی دا: "لە کوردستان و ناوچەکەش سەرۆک بارزانی ڕۆڵێکی گەورەی هەیە و توانیویە ڕۆڵێکی گەورە بۆ چارەسەرکردنی کێشە و ئاریشەکانی کورد و ناوچەکەش بگێڕێت و بووەتە مەرجەع بۆ ناوچەکە، چوونکە بەهۆی سیاسەت و لیزانیی ئەوەوە ئێستا کوردستان لە قۆناغێکی بڵنددایە، چونکە هەمیشە بەرژەوەندیی کوردستانی پێش هەموو شتێک خستووە."

ساغلام دەشڵێ: "کوردستان لە ناوچەکەدا زۆری زوڵم و ستەم دیتووە، بەڵام ئێستا کوردستان لە قۆناغیکی زێرین و نموونەدایە، چونکە ئەو پێکەوەژیانەی ئێستا لە هەرێمی کوردستان هەیە، بووەتە نموونە بۆ ناوچەکە."