پەیامی پیرۆزبایی سەرۆک بارزانی بەبۆنەی یادی 26 ساڵەی دامەزراندنی کوردستان تیڤی

پەیامی کورد   ...   پەیامی پیرۆزبایی سەرۆک بارزانی بەبۆنەی یادی 26 ساڵەی دامەزراندنی کوردستان تیڤی

سەرۆك بارزانی بەبۆنەی 26 ساڵەی دامەزراندنییەوە، پەیامێكی پیرۆزبایی ئاراستەی (كوردستان تیڤی) كرد و رایگەیاند، لەو یادەدا ئەو چاوەڕوانییە لە ئێوەی ئازیز هەیە، ببنە سەکۆی سەرەکی بڵاوکردنەوەی هۆشیاری نیشتیمانی و ڕاستگۆیی لەناو میدیای کوردیدا".

دەقی پەیامە پیرۆزباییەكەی سەرۆك بارزانی بەبۆنەی 26 ساڵەی دامەزراندنی کوردستان تیڤی:

بەناوی خودای بەخشندە و میهرەبان

بۆ سەرپەرشتیاری گشتی تۆڕی میدیایی کوردستان و بەڕێوەبەر و سەرجەم كارمەندانی كوردستان تیڤی

بەبۆنەی بیست و شەش ساڵەی كاركردنی كوردستان تیڤی وەک یەكەم كەناڵی سەتەلایت لە كوردستان، پیرۆزبایی ئەو یادە مێژووییەتان لێ دەكەم. كوردستان تیڤی لەپێناو ئامانجێکی بەرز و ڕەوای نیشتیمانی و، لە هەلومەرجێكی پێویست و لە قۆناغێكی هەستیار بە هەوڵ و ماندووبوونی دڵسۆزان دامەزرا و بووە مینبەرێکی گرینگی گەیاندنی پەیامی خەڵكی كوردستان و هەروەها بوو به‌ بەشێک لەخەباتی نیشتیمانی و نەتەوەییمان.

لەو یادەدا ئەو چاوەڕوانییە لە ئێوەی ئازیز هەیە، ببنە سەکۆی سەرەکی بڵاوکردنەوەی هۆشیاری نیشتیمانی و ڕاستگۆیی لەناو میدیای کوردیدا ئەویش بە سوودوەرگرتن لە تەکنۆلۆژیای سەردەم و  تەکنیک و شێوازی تازەی کارکردن و پابەندبوون بە چوارچێوەکانی کاری پرۆفیشناڵی میدیایی و هەروەها ڕەچاوکردنی بەها نیشتیمانی و نەتەوەییەکان.

دەستخۆشی لە ئەرک و ماندووبوونتان دەکەم و هەر سەرفراز و سەركەوتووبن.

مسعود بارزانی

17ی کانوونی دووەمی 2025