ئەنجومەنی وەزیران ئەمڕۆ کۆ دەبێتەوە

پەیامی کورد … ئەنجومەنی وەزیران ئەمڕۆ کۆ دەبێتەوە

ئەمڕۆ  ئەنجومەنی وەزیرانی هەرێم كۆدەبێتەوە بڕیارە پوختەی دەرئەنجامی ئامادەبوونی شاندی وەزاریی حکوومەتی هەرێمی کوردستان لە دانیشتنی پەرلەمانی کوردستان بخرێتە ڕوو.

فەرمانگەی میدیا و زانیاری هەرێم بڵاویكردەوە،"ئەنجومەنی وەزیرانی هەرێم، ئەمڕۆ چوارشەممە ٧ی تەمووزی ٢٠٢١، کۆبوونەوەی هەفتانەی خۆی ئەنجام دەدات و لە کۆبوونەوەکەدا پوختەی دەرئەنجامی ئامادەبوونی شاندی وەزاریی حکومەتی هەرێمی کوردستان لە دانیشتنی پەرلەمانی کوردستان بە ژمارە (16 ) لە ڕۆژی دووشەممە 28-6-2021 وەڵامدانەوەی پرسیاری پەرلەمانتاران لە لایەن شاندی وەزارییەوە دەخرێتەڕوو،لەگەڵ خستنەڕووی ڕاسپاردەی کۆتایی دانیشتنی پەرلەمان".

ئاماژە بەوەشدراوە،"خستنەڕووی دەقی هەموارکراوی ڕەشنووسی پڕۆژە یاسای (هەمواری یاسای وەزارەتی دارایی و ئابوری لە هەرێمی کوردستان - عێراق ژمارە (5)ی ساڵی 2010) تایبەت بە هێنانەکایەی بەڕێوەبەرایەتی گشتی دڵنیایی (التأمين) تەوەرێكی دیكەی كۆبوونەوەكە دەبێت".

بڕیارە لە كۆبوونەوەكەدا ڕاپۆرتێکی شیکاری سەبارەت بە ڕەشنووسی پڕۆژە یاسای (پەروەردە و فێرکاریی لە هەرێمی کوردستان - عێراق) بخرێتە بەرباس، هاوكات بڕیاری کۆبوونەوەی ئەنجومەنی باڵای ئابوری لە ڕۆژی یەکشەممە 4-7-2021  سەبارەت بە ڕێکخستنەوەی داهاتی گشتی باج و ڕسومات دەخرێتەڕوو.