برینداربوونی دوو کۆڵبەر لە سنوورەکانی ڕۆژهەڵاتی کوردستان

دوو کۆڵبەر لە کاتی کۆڵبەریدا لە سنووری شاری بانە لە ڕۆژهەڵاتی كوردستان، بە تەقەی ڕاستەوخۆی هێزە ئەمنییەکانی ئێران بریندار کران.

بەپێی زانیارییەکان، شەوی ڕابردوو، لە ئەنجامی تەقەی ڕاستەوخۆی هێزەکانی ئێران بۆ سەر ژمارەیەک لە کۆڵبەران لە سنووری (هەنگەژاڵ)ی شاری بانە، دوو کۆڵبەر بریندار بوون.

تاوەکوو ئێستا ناسنامەی یەکێک لەو دوو کۆڵبەرە بە ناوی فەخرەدین یووسفی ئاشکرا بووە و ناسنامەی کۆڵبەرەكەی دیکە نادیارە.

لەمبارەیەوە ڕێكخراوی (هەنگاو) بۆ مافەکانی مرۆڤ بڵاوی كردووەتەوە، ئەم دوو کۆڵبەرە قاچیان بریندار بووە و بۆ نەخۆشخانەی (سەڵاحەدینی ئەیووبی)ی شاری بانە گواستراونەوە و دواتر فەخرەدین یووسفی بەهۆی سەختیی برینەکەیەوە بۆ نەخۆشخانەی تاڵقانی لە شاری کرماشان گواستراوەتەوە.