پڕۆژەیەکی گەورەی بواری ئاژەڵداری لە ئاکرێ ئەنجام دەدرێت

پەیامی کورد   ...   پڕۆژەیەکی گەورەی بواری ئاژەڵداری لە ئاکرێ ئەنجام دەدرێت

بەڕێوبەری وەبەرھێنانی دھۆک دەڵێت: لە چوارچێوەی گرنگی دانی حکوومەتی ھەرێمی کوردستان بە کەرتی کشتوکاڵ و ئاژەڵداری، پڕۆژەیەکی گەورەی بەخێوکردنی مانگا و بەرھەمی شیر بە گوژمەی نزیکەی نۆ ملیۆن دۆلار لە ئاکرێ جێبەجێ دەکرێت.

دکتۆر ھەڤال سدیق، بەڕێوبەری وەبەرھێنانی دھۆک، ڕایگەیاند : حکوومەتی ھەرێمی کوردستان لە کابینەی نۆیەم گرنگی زۆر بە کەرتی کشتوکاڵ و ئاژەڵداری دەدات و ھەنگاوی زۆر باشیشی لەو باریەوە ناوە، لە سنووری قەزای ئاکرێ لە ناحیەی گردەسێن پڕۆژەیەکی گەورەی بەخێوکردنی مانگا و بەرھەمی شیر بە سەرمایەی ھەشت ملیۆن و ٦٨٣ھەزار دۆلارە ئەنجام دەدرێت.

دکتۆر ھەڤال سدیق ووتیشی : پڕۆژەکە دراوەتە وەبەرھێنەرێک بۆ ئەوەی دەست بە جێبەجێکردنی بکرێت، لەو پڕۆژەیە ژمارەیەکی زۆری مانگا بەخێو دەکرێن و بەرھەمی جۆراوجۆری شیریشی لێ بەرھەم دێت و دەبێتە یەکێک لە گەورەترین پڕۆژەکانی سامانی ئاژەڵ لە سنووری پارێزگای دھۆک.

دەشڵێت: ئەو پڕۆژەیە سوودێکی زۆر باشی بۆ دەڤەرەکە دەبێت بۆ بەخێوکردنی مانگا و بەرھەمی شیر و ڕەخساندنی دەرفەتی کار بۆ خەڵکی دەڤەرەکە.