ئێران هەڕەشە لە بەڕێوەبەرانی ڕێوڕەسمەکانی نەورۆز لە ڕۆژهەڵاتی كوردستان دەكات

بەڕێوەبەرانی ڕێوڕەسمەکانی نەورۆز لە ڕۆژهەڵاتی کوردستان، بەهۆی بەڕێوەبردنی رێوڕەسمی شكۆدارانەی نەورۆز، لەلایەن هێزە ئەمنییەکانی ئێرانەوە دەستگیر دەکرێن.

لە ماوەی ڕۆژانی ڕابردوودا، چەندین کەس لە بەڕێوەبەران و بەشداربوانی ڕێوڕەسمەکانی نەورۆز لە ڕۆژهەڵاتی کوردستان دەستگیر کران و هەڕەشەیان لێ کراوە.

میدیاکانی ڕۆژهەڵاتی کوردستان بڵاویان کردووەتەوە، کە لە شارەکانی سنە، بۆکان، سەقز، گەیلانی غەرب و پیرانشار، سەرەڕای هەڕەشەکان بە مەبەستی ڕێگریکردن لە ڕێوڕەسمەكانی نەورۆز، چەندین کەس لەلایەن ئێرانەوە دەستگیر کراون.

بەپێی هەواڵی ماڵپەڕەكانی مافی مرۆڤ، لە شاری سنە و بۆکان دوو کەس بە ناوەکانی (جەلال خودامورادی) و (سمکۆ نەسروڵایی) لەلایەن ئیتلاعاتی ئێرانەوە دەستگیر کراون و چوونەتە سەر ماڵی (ئارمان ساعدپەنا)ش، بەڵام لە ماڵ هەڵهاتووە و نەیانتوانیوە دەستگیری بکەن.