مەسروور بارزانی فەرمانی دامەزراندنی مامۆستایانی وانەبێژی واژوو کرد

پەیامی کورد   ...   مەسروور بارزانی فەرمانی دامەزراندنی مامۆستایانی وانەبێژی واژوو کرد

سەرۆکی حکوومەتی هەرێمی کوردستان فەرمانی دامەزراندنی مامۆستایانی وانەبێژی هەردوو وەزارەتی پەروەردە و خوێندنی باڵای واژوو کرد.

28ـی ئابی 2024، مەسرور بارزانی، سەرۆکی حکوومەتی هەرێمی کوردستان فەرمانی دامەزراندنی بۆ سەرجەم مامۆستایانى وانەبێژ لە وەزارەتى خوێندنى باڵا و توێژینەوەى زانستى و وەزارەتى پەروەردە بە شێوەى گرێبەست واژوو کرد.

بە فەرمانی ژمارە (4142) لە 28ـی ئابی 2024، مەسرور بارزانی، سەرۆکی حکوومەتی هەرێمی کوردستان فەرمانی دامەزراندنی وانەبێژانی بە گرێبەست ئیمزا کرد و تێیدا هاتووە: بە ڕەچاوکردنی ڕۆڵی گەورەی مامۆستایانی وانەبێژ لە بەردەوامیدان بە پرۆسەی پەروەردە و فێرکردن و خوێندنی باڵا، ئەو بڕیارەیان داوە.

لە خاڵی یەکەمی فەرمانەکەدا هاتووە "دامەزراندنی سەرجەم مامۆستایانی وانەبێژ لە وەزارەتی پەروەردە و وەزارەتی خوێندنی باڵا و توێژینەوەی زانستی بەشێوەی گرێبەست بەپێی ڕێنمایی دارایی ژمارە (10)ـی ساڵی 2019".

هاوکات لە خاڵی دووەمی فەرمانەکەی سەرۆکوەزیران مەسروور بارزانیدا، هاتووە "هەردوو وەزارەتی پەروەردە و خوێندنی باڵا ڕاسپێردراون بە ووردبینیکردنی لیستی ناوی وانەبێژان و ئەنجامدانی ڕێکارەکانی دامەزراندنیان".