سەرۆکی حکوومەت پێشوازی لە شاندێکی ئەنجوومەنی بازرگانی ئەمریکا ـــ کوردستان کرد

پەیامی کورد   ...   سەرۆکی حکوومەت پێشوازی لە شاندێکی ئەنجوومەنی بازرگانی ئەمریکا ـــ کوردستان کرد

یەکشەممە 11/17، مەسروور بارزانی، سەرۆکی حکوومەتی هەرێمی کوردستان، پێشوازی لە شاندێکی ئەنجوومەنی بازرگانی ئەمریکا ـــ کوردستان ( USKBC) کرد، کە لە نوێنەری ژمارەیەک لە کۆمپانیا ئەمریکییەکان پێکهاتبوو.

لە دەستپێکی کۆبوونەوەدا، دەیڤد تافوری، سەرۆکی ئەنجوومەنی بازرگانی ئەمریکا ـــ کوردستان، پیرۆزبایی سەرکەوتنی پرۆسەی هەڵبژاردنی خولی شەشەمی پەرلەمانی کوردستان و ئەنجامەکانی لە سەرۆکی حکوومەت کرد، کە بە شێوەیەکی ئازاد و دیموکراتییانە بەڕێوەچوو، هەروەها کورتەیەکی دەربارەی ئامانجی سەردانەکەیان خستەڕوو. لەمبارەیەوە ئاماژەی بەوە دا کە هەرێمی کوردستان ڕۆڵ و پێگەیەکی گرینگی لە عێراق و ناوچەکەدا هەیە و ئامانج لە سەردانەکەیان دەربڕینی پشتیوانی و پەرەپێدانی پەیوەندی ئابووری و بازرگانی و وەبەرهێنانە لەگەڵ هەرێمی کوردستان.

سەرۆکی حکوومەت وێڕای ئاماژەدان بە گۆڕانکاری و پێشهات و پەرەسەندنەکانی عێراق و ناوچە و پەیوەندییەکانی هەرێمی کوردستان و حکوومەتی فیدراڵ، باسی لە چاکسازییەکانی حکوومەتی هەرێمی کوردستان کرد، بە تایبەتی لە بوارەکانی بەدیجیتاڵکردنی خزمەتگوزارییەکان و بەرەوپێشبردنی سیستەمی بانکی و پڕۆژەی (هەژماری من) و کارئاسانیکردن بۆ وەبەرهێنەران.

لە بە شێکی دیکەی کۆبوونەوەدا، سەرۆکی حکوومەت باسی لە گرینگی دەستپێکردنەوەی هەناردەکردنی نەوتی هەرێمی کوردستان کرد، کە وەستانی، زیانی چەندین ملیار دۆلاری لە بوودجەی گشتی داوە و پێویستە لە زووترین کاتدا، پرۆسەی هەناردەکردنەوەی نەوت دەست پێ بکاتەوە.

لە کۆتایی دا، سەرۆکی حکوومەت ووڵامی پرسیار و سەرنج و تێبینییەکانی ئامادەبووانی دایەوە.