په‌یامى سه‌رۆكى هه‌رێمى كوردستان سەبارەت بە مامۆستایان و فه‌رمانبه‌رانى مانگرتوو

پەیامی کورد   ...   په‌یامى سه‌رۆكى هه‌رێمى كوردستان سەبارەت بە مامۆستایان و فه‌رمانبه‌رانى مانگرتوو

له‌ نزیكه‌وه‌ چاودێری دۆخى مامۆستایان و فه‌رمانبه‌رانى مانگرتوو ده‌كه‌م كه‌ ماوه‌ى چه‌ند ڕۆژێكه‌ له‌ سلێمانى بۆ داواى چاره‌سه‌ركردنى كێشه‌ى مووچه‌، مانیان له‌ خواردن گرتووه‌. چاره‌سه‌ركردنى كێشه‌ى مووچه‌ و شایسته‌ دارایییه‌كانى هه‌رێمى كوردستان داوایه‌كى ڕه‌وایه‌ و هه‌موومان پشتگیری لێ ده‌كه‌ین.

بۆ ئه‌م‌ مه‌به‌سته‌، ئێمه‌ له‌ سه‌رۆكایه‌تى و حكوومه‌تى هه‌رێمى كوردستان هه‌وڵێكى زۆرمان له‌گه‌ڵ حكوومه‌تى فیدراڵى داوه. هه‌ر له‌م چوارچێوه‌یه‌دا خۆشبه‌ختانه‌ له‌ ئه‌نجامى گفتوگۆ و لێكگه‌یشتنى هه‌ردوولا و به‌ هاوكاری لایه‌نه‌ په‌یوندیداره‌كان، هه‌موارى یاساى بوودجه‌ى گشتى فیدراڵى په‌سه‌ند كرا و ئومێدى چاره‌سه‌رى یه‌كجاری پرسی‌ مووچه‌ و شایسته‌ داراییه‌كانى هه‌رێمى كوردستان هه‌یه‌.

په‌یام و داواكاری مامۆستایان و مووچه‌خۆران به‌گشتی، به‌ ته‌واوى به‌ لایه‌نه‌ په‌یوه‌ندیداره‌كان گه‌یشتووه‌، بۆیه‌ داوایان لێ ده‌كه‌م ڕه‌چاوى بارى ته‌ندرووستییان بكه‌ن و ده‌ست له‌ مانگرتن هه‌ڵبگرن. هه‌موو لایه‌ك دڵنیا ده‌كه‌ینه‌وه‌ که‌ هه‌رێمى كوردستان له‌ هه‌وڵه‌كانى به‌رده‌وام ده‌بێت بۆ چاره‌سه‌ركردنى ته‌واوى كێشه‌كان له‌گه‌ڵ حكوومه‌تى فیدراڵى عێراق.