لە رۆژهەڵاتی کوردستان گەڕان بە دوای سێ شاخەوانی بێ‌سەروشویندا بەردەوامە

پەیامی کورد... لە رۆژهەڵاتی کوردستان گەڕان بە دوای سێ شاخەوانی بێ‌سەروشویندا بەردەوامە

سەرەڕای بارینی بەفرێکی زۆر سێ شاخەوانی شاری نەغەدەی رۆژهەڵاتی کوردستان ماوەی سێ رۆژە لە بەرزاییەکانی "ڕەندۆڵە"ی شنۆ بێ‌سەر و شوێنن.

دوای ئەوەی هەواڵی بێ سەروشوێن بوونی ٥ شاخەوانی خەڵکی نەغەدە لە بەرزاییەکانی کێوی ڕەندۆڵەی شنۆ بڵاو بووەوە. خەڵکی ناوچەکە و فریاگوزارانی شنۆ دەستیان بە گەڕان کرد و لە ئاکامدا رۆژی یەکەم دووکەس لە شاخەوانەکان دۆزرانەوە و سێ شاخەوانەکەی دیکە هەروا بێ سەروشوێنن.

بە گوێرەی سەرچاوان دەڵێن ئەم سێ شاوخەوانە کەوتوونەتە ژێر بارستایی ڕنووی بەفر و لەبەر ئەمەیە دؤزینەوەیان ئەستەم بووە.

ئەمە لە کاتێکدایە لە دوو ڕۆژی ڕابردوودا لە نێوان ٣٠ بۆ ١٠٠ ملیمەتر بەفر لە شارەکانی پارێزگاکانی ڕۆژهەڵاتی کوردستان باریوە و ئێستاش بەفربارین بەردەوامە.

پەیوەندییە گشتییەکانی بەڕێوەبەرایەتیی گشتیی پەروەردەی پارێزگای سنە ڕایگەیاندووە، بەهۆی سەرما و شەختە و بەردەوامیی بارینی بافرەوە هەموو قوتابخانەکانی هەردوو ناحیەی سەرشیو و کۆماسی سەر بە قەزای مەریوان داخراون.

هاوکات ئاماژە بەوەش دراوە قوتابخانە بنەڕەتییەکانی شار و گوندەکانی سەر بە قەزای دیواندەرەوە بەهۆی بەردەوامیی کڕێوە و شەختەوە داخراون.

بارینی بەفر لە ڕۆژی شەممەوە لە ڕۆژهەڵاتی کوردستان دەستی پێ کردووە و لە پارێزگای ورمێش قوتابخانەی گوندەکانی چالدێران، قوتول، سەفاییە، شنۆ و سلیڤانا داخراون.