پۆلیسی تورکیا هەڵیکوتایە سەر بارەگای هەدەپە

پەیامی کورد... پۆلیسی تورکیا هەڵیکوتایە سەر بارەگای هەدەپە

لە شاری جزیرەی باکووری کوردستان، پۆلیس هەڵیکوتاوەتە سەر بارەگای پارتی دیموکراتی گەلان (هەدەپە) و دوای پشکنین، هەموو کەلوپەلی ژوورەکەیان تێک و پێک داوە و هەموو نووسراوەکانی ناو بەرەگاکەشیان فڕێ داوەتە سەر زەوی و جامەکانی بارەگاکەشیان شکاندووە.

ماڵپەڕی (هەدەپە) بڵاوی کردووەتەوە، بەبێ ئاگاداریی ئەوان، پۆلیس هەڵیکوتاوەتە سەر بارەگاکەیان و زیانیان بە کەلوپەلەکان گەیاندووە.

هەدەپە دەڵێت:» ئەمەی پۆلیس کردوویەتی، کارێکی ترسنۆکانەیە و دەرخەری ئەوەیە کە ئەوان چەند لە پارتەکەمان دەترسێن. ئەوان دوژمنی کتێب و سیاسەتی ئێمە و جزیرەن، بۆیە دەسەڵات مەحکوومی دۆڕاندنە «.

تاوەکوو ئێستا لەلایەن حکومەتەوە هیچ زانیارییەک بڵاو نەکراوەتەوە کە بۆ چی هەڵیانکوتاوەتە سەر بارەگای هەدەپە؟ بەڵام ئەمە جاری یەکەم نییە و پێشتریش لە ئیستەنبوڵ و ئیزمیر، بە هەمان شێوە پۆلیس هەڵیکوتایە سەر بارەگای هەدەپە و زیانی بە کەلوپەلەکان گەیاند.