ئەمریکا و ئەورووپا پێشنیارێکی هاوبەش بۆ حکوومەتی ڕاگوزەر لە ئەفغانستان دەکەن

پەیامی کورد … ئەمریکا و ئەورووپا پێشنیارێکی هاوبەش بۆ حکوومەتی ڕاگوزەر لە ئەفغانستان دەکەن

بەمەبەستی کۆتاییهێنان بە شەڕ و توندوتیژییەکانی ئەفغانستان، ئەمریکا، ئەوروپا و بەریتانیا داوای ئاگربەستی سەرتاسەری لە تالیبان و حکومەتی ئەو وڵاتەدەکەن و، پێشنیاز ده‌كه‌ن بۆ پێکهێنانی حکومەتێكی راگوزەر.

لە بەیاننامەیەکدا، نوێنەرانی ئەمریکا، یەکێتی ئەوروپا و بەریتانیا، لە کۆنفرانسی ئاشتەوایی رۆما رایانگه‌یاند: باش دەزانن گەیشتن بە رێککەوتنێکی سیاسی لە ئەفغانستان، بەتایبەتی لەسەر پرسی دەستور کاتێکی زۆری پێویستە، هەر بۆیە بۆ قۆناغی ئێستا باشترین بژاردە راگەیاندنی ئاگربەستە لە نێوان حکومەتی کابول و بزوتنەوەی تالیبان.

له‌ به‌یاننامه‌كه‌دا پێشنیازیان کردووە، پێویسته‌ له‌ ئێستادا حکومەتیکی راگوزەری فراوان پێکبهێنرێت تا ئەو کاتەی رێککەوتنی کۆتایی لە بارەی ئایندەی سیاسی ئەفغانستانەوە دەکرێت.

هه‌ر سێ لایەنەكه‌ جەختیان لەوەشکردۆتەوە، کە چ لە ماوەی حکومەتی راگوزەر و، چ دوای گەیشتن بە رێککەوتنی کۆتایی، لە سەر حکومەتی هەمیشەیی داهاتووی ئەفغانستان پێویستە رەچاوی بنەماکانی دیموکراسی و مافی مرۆڤ بکات و، پابەندبێت بە بەرەنگاربوونەوەی تیرۆر و ریگریی بكات لە بوونی ئەفغانستان بە حەشارگە و شوێنی داڵدەدانی گروپە توندڕەوەکان.

جێگه‌ی باسه‌، ئەمە جاری یەکەمە کۆمەڵگای نێودەوڵەتی و، وڵاتانی رۆژئاوایی پێکهێنانی حکومەتی راگوزەر وەک بژاردەیەک بۆ چارەسەرکردنی کێشەی ئەفغانستان بخەنەڕوو.