نرخی گاز ئاسایی بووەوە

پەیامی کورد    ...    بەڕێوبەری كارگەی گازی هەولێر گوتی، بە هۆی گۆڕانكاری لە كۆمپانیای دابینكردنی غاز، هەندێك گرفتی كەمی غاز دروست ببوو، بەڵام لە ئێستادا كێشەكە چارە كراوە و ئەمڕۆ نرخی گاز ئاسایی دەبێتەوە.

بەختیار عەبدوڵڵا، بەڕێوبەری كارگەی گازی هەولێر رایگەیاند: "هەموو ساڵێك لە كۆتایی ساڵدا كۆمپانیای داناگاز گرێبەستی نوێ دەكاتەوە و پێش كۆتایی ساڵ غاز بە ئێمە دەفرۆشێت، ئەمساڵیش پێش كۆتایی ساڵ گرێبەستەكە تازە كرایەوە و درا بە كۆمپانیایەكی دیكە، بەڵام تاوەكو ئێستا دەوروتەسلیم نەكراوە، بۆیە ئەو بەشەی ئێمە پێویستمانە، بە دەستمان ناگات، هەر بۆیە وەزارەتی سامانە سرووشتییەكان سەرقاڵی چارەكردنی ئەو گرفتەن".

عەبدوڵڵا گوتیشی: "بە هۆی ئەو گرفتەوە، نرخی گاز هەندێك گران بوو، چوونكە لە سلێمانی بە نرخێكی گرانتر و رێژەیەكی كەمتر دەدرایە كارگە ئەهلییەكان، بۆیە داوامان لێ كردن لە سەرچاوەی دیكە پەیدای بكەن لە دەرەوەی ووڵات، بۆیە توانرا كێشەكە چارەسەر بكرێت و ئەمڕۆ نرخی گاز ئاسایی دەبێتەوە".

ناوبراو باسی لەوەش كرد: "كارگەی گاز لە سلێمانی هەم گازی كەم بە ئێمە دەدا و هەمیش بە گرانی دەیداینێ، بۆیە پێویستە بازاڕ قۆرغ نەكرێت و ناكرێت بەو شێوەیە بێت و دەبێ چاودێری بكرێن، چوونكە شتێك نییە بە ناوی گازی بازرگانییەوە و هەر كەسێك گاز بە گران بفرۆشێت، رێگری لێ دەكرێت".

دەشڵێ، ئەوەی جێگەی دەستخۆشی و خۆشحاڵییە، ئەمڕۆ كێشەكە چارەسەر بووە، چوونكە هیچ سكاڵایەكمان بە دەست نەگەیشتووە وەكو رۆژانی ڕابردوو.