وەزارەتی نەوتی عێراق، داهاتی مانگی رابردووی نەوتى ئاشكراكرد

بەپێی وتەی وتەبێژی وەزارەتی نەوتی عێراق، لە مانگی چواری ئەمساڵدا (١٠٠) ملیۆن بەرمیل نەوت هەناردەی دەرەوە کراوە و زیاتر لە شەش ملیار دۆلار داهاتەکەی بووە.

لە لێدوانێکی رۆژنامەوانیدا، عاسم جیهاد، وتەبێژی وەزارەتی نەوتی عێراق ئاشکرایکردووە، کە بەپێی داتاکانی کۆمپانیای بەبازاڕکردنی نەوتی عێراق (سۆمۆ)، لە مانگی چواردا (١٠٠) ملیۆن و (١٩٧) هەزار بەرمیل نەوتی هەناردەکراوە.

دەشڵێت، ئەو (١٠٠) ملیۆن بەرمیل نەوتە هەر بەرمیلێکی بە تێکڕای (٦٤) دۆلار و (٨٩) سەنت فرۆشراوە، کە داهاتەکەی شەش ملیار و (٥٠٠) ملیۆن دۆلار بووە.

بەگوێرەی ئامارەکانی کۆمپانیای سۆمۆ، هیچ بڕە نەوتێک لە کەرکوکەوە هەناردەنەکراوە. 

جێی ئاماژەیە لەدوای رووداوەکانی (١٦)ی ئۆکتوبەری ساڵی رابردوو، حکومەتی عێراق هەناردەکردنی نەوتی کەرکوکی لەڕێگەی بۆری نەوتی کوردستان - جەیهانەوە راگرتووە.