تورکیا؛ لە ڕۆژێکدا حەوت ژن کوژران

حەوت ژن لە ناوچە جیاوازەکانی تورکیا لە ماوەی یەک ڕۆژدا لەلایەن هاوژینەکانیانەوە کوژران.

کاناڵی تەلەڤیزیۆنیی (خەبەر تورک) بڵاوی کردەوە، تەنیا لە ڕۆژی سێشەممەدا 28/2/2024، حەوت ئافرەت بە شێوەیەکی دڕندانە لەلایەن هاوژینی ئێستا، یان هاوژینی پێشوویان کوژراون، ئەوەش خراوەتە ڕوو، کە کوژرانی ئەو ئافرەتانە لە شارەکانی ئیزمیر، بورسا، سەقاریە، ئەرزروم دنیزلی و ئیستانبوڵ بووە.

بەپێی ڕاپۆرتەکە، ئەو ئافرەتانەی کوژراون، تەمەنیان لە نێوان 32 تا 49 ساڵ بووە و بە فیشەک یان چەقۆ کوژراون، سێ کەس لە بکوژەکان لە دوای کوشتنی هاوژینەکانیان، هەوڵی خۆکوشتنیان داوە.

ڕێکخراوی مەدەنیی (کوشتنی ژنان ڕادەوەستێنین) ڕایگەیاندبوو، لە ماوەی ساڵی 2023دا لە تورکیا، 315 ژن کوژراون.