Meletî | Di erdheja dawî de 29 avahî hilwesiyan: 1 wefat û 110 birîndar hene

PeyamaKurd - Serokê Serokatiya Rewşa Bilez û Karesatan (AFAD) Yunus Sezer derbarê erdheja îro ya bi pileya 5.6 ya bajarê Meletî yê Bakurê Kurdistanê de daxuyanî da. Sezer ragihand ku 29 avahî hilweşiyane, welatiyekî can daye û 110 kes jî birîndar bûne.

Yunus Sezer got: “Li vê derê bi awayekî xurt xebatên me yên lêgerîn û rizgarkirinê didomin. Karmendên me yên lêgerîn û rizgarkirinê ku ji Meletî û  bajarên derdorê hatin, tîmeke me ya 657 kesî, xebatên xwe yên lêgerîn û rizgarkirinê didomînin. Niha li 2 avahiyan xebatên rizgarkirinê berdewam in. Ji bin kavilan 32 welatiyên me bi saxî hatin rizgarkirin.”

Serokê AFADê diyar kir, li herêmê erdhejên domahîk berdewam dikin û ji ber vê yekê ji welatiyan daxwaz kir ku ji bo wergirtina kelûpelên xwe, nekevin nav avahiyên ku xisar dîtine.