Lûtkeya Trump û Netanyahû ya li ser Îranê li Qesra Spî dest pê dike

PeyamaKurd – Serokê Amerîkayê Donald Trump îro li Qesra Spî mazûvaniya Serokwezîrê Îsraîlê Benjamîn Netanyahû dike.

Armanca sereke ya vê hevdîtinê, gotûbêjkirina stratejiya nû ya li dijî Tehranê ye. Tê payîn ku Netanyahû zextê li Trump bike da ku siyaseta “zexta herî zêde” tundtir bibe.

Trump berî civînê ragihand ku ew “peymaneke baş” bi Îranê re tercîh dike, lê tekez kir ku vebijarka leşkerî hîn jî “li ser maseyê ye”.

Netanyahû daxwaz dike ku her rêkeftineke mihtemel ne tenê nukleerî, lê “sînordarkirina mûşekên balîstîk û bidawîkirina piştgiriya ji bo komên çekdar” jî li xwe bigire.

Şiyana mûşekî ya Îranê ya bi menzîla 2,000 kîlometreyî, ji bo Tel Avîvê metirsiyeke mezin e.

Ji aliyê din ve, Tehran daxwaza sînordarkirina çarçoveya danûstandinan dike û li dijî “zext û bandorên wêranker” hişyarî dide.

Trump di daxuyaniyên xwe yên dawî de diyar kir ku ew ne tenê li ser mizakereyan, lê li ser xurtkirina hêza deryayî bi “keştiyek balafiran a duyemîn” jî difikire.