Mercên dayîna vîzeyê ji bo Umreyê hatin guhertin

PeyamaKurd – Mercên dayîna vîzeyê ji bo Umreyê, ji aliyê Erebistana Siûdî tên guhertin û di çarçoveya wê de Wezareta Hec û Umreyê li Siûdiyê bi daxuyaniyekê diyar kir: ‘‘Ew kesên bi vîzeya Umreyê serdana Siûdiyê bikin, eger derziyên wergirtibin li Siûdiyê cîhê baweriyê be, wê demê dikarin dest bi bicîhanîna erkên Umreyê bikin.’’

Herwiha di daxuyaniyê de hat eşkerekirin: ‘‘Ew kesên bi vîzeya Umre serdana wî welatî dikin, eger derzî wergirtibin û ew derzî ji aliyê Rêxistina Tenduristiya Cîhanî ve hatibe pejirandin û cîhê baweriyê be, wê demê dema hatin wê 48 saetan bên karantînakirin û piştî wê jî testa vîrusa Koronayê wê ji wan re bê kirin û eger encam negatîf bû, wê demê wê rê ji wan re bê dayîn ku erkên xwe yên Umreyê bi cîh bînin.

Wezareta Hec û Umre ya Siûdiyê hemû Mislimanên dixwazin bi armanca Umreyê serdana wî welatî bikin agahdar kir, bêyî wergirtina her du derziyên Koronayê vîzeyê nade tu kesî.