Îran, Rûsya û Çîn li Kendava Omanê dê dest bi tetbîqata "Kembera Ewlehiyê" bikin

PeyamaKurd – Sibê, roja Pêncşemê 19ê Sibata 2026an, hêzên deryayî yên Îran, Rûsya û Çînê li Kendava Omanê û bakurê Okyanûsa Hindê dê dest bi tetbîqateke leşkerî ya mezin bikin.

Ev tetbîqata ku bi navê "Kembera Ewlehiya Deryayî" hat ragihandin, di demekê de pêk tê ku krîza li herêmê û deryayên navneteweyî di asta herî bilind de ye.

Berdevkê tetbîqatê, Kontramîral Hesen Meqsûdlû, ragihand ku armanca sereke ya van manevreayan xurtkirina ewlehiya deryayî û parastina keştiyên bazirganî û tankerên petrolê ye. Di çarçoveya tetbîqatê de, hêzên deryayî yên her sê welatan dê li ser van xalan bixebitin:

1. Hevahengiya Teknîkî: Başkirina têkiliyên leşkerî di navbera keştiyên her sê dewletan de.
2. Şerê li Dijî Terorê: Operasyonên hevbeş ên li dijî terorîzma deryayî û rêgirên deryayî.
3. Operasyonên Rizgarkirinê: Tecribekirinq şiyanên alîkariya keştiyên ku rastî êrîş an qezayan tên.

Peyama ji bo Rojavayê 

Ev tetbîqata ku ji sala 2019an ve bi awayekî salane tê lidarxistin, ji aliyê pisporên leşkerî ve wekî peyamekê ji bo Amerîka û hevalbendên wê tê dîtin.

Fermandarê fîloya Rûsyayê, Alekseyî Sergîv, diyar kir ku ew amade ne li her herêmê tetbîqatên wiha bikin, ku ev yek nîşana kûrkirina hevkariya leşkerî ya eniya li dijî Washingtonê ye.

Beşdariya Hêzên Deryayî yên Sipaha Pasdarên Şoreşa Îslamî (IRGC) di vê tetbîqatê de, giringiya manevreyan ji bo stratejiya parastinê ya Îranê zêdetir dike, bi taybetî di parastina herêmên stratejîk ên mîna Tengava Hurmizê de.