Nûman Kûrtûlmûş: Piştî Cejna Remezanê rêziknameyên yasayî dê bên meclîsê

PeyamaKurd – Serokê Meclîsa Tirkiyeyê Nûman Kûrtûlmûş, di bernameyeke fitarê de li Enqerê daxuyaniyên dîrokî dan û ragihand ku rêziknameyên yasayî yên têkildarî "Rapora Komîsyona Yekîtiya Neteweyî, Biratî û Demokrasiyê" dê piştî meha Remezanê pêşkêşî parlamentoyê werin kirin.

Kûrtûlmûş bal kişand ser giringiya lezkirina vê pêvajoyê û diyar kir ku fersendeke dîrokî ketiye destê Tirkiyeyê da ku "mijara terorê ya 50 salan ji rojeva welat derxîne."

Wî destnîşan kir ku ji sedî 95ê partiyên siyasî yên di meclîsê de piştgirî dane vê xebatê û ev yek wekî "tifaqa neteweyî" pênase kir.

Kûrtûlmûş di axaftina xwe de "Modela Tirkiyeyê" ya ji bo çareserkirina nakokiyan derxist pêş û îdia kir ku di vê modelê de cihê navbeynkarên derveyî (çavê sêyem) tune ye. Li gorî wî, "çavê sêyem" gel bi xwe û nûnerên milet ên di parlamentoyê de ne.

Kûrtûlmûş bi bîr xist ku pêvajoyê di Tebaxa 2024an de bi gava sembolîk a Devlet Bahçelî û Partiya DEMê dest pê kir û bi merasîma şewitandina çekan a PKKyê ya li Silêmaniyê (Tîrmeha 2025an) gihîşt asteke nû.

Wî herwiha tekez kir ku fikarên derbarê xetereya li ser "avahiya yekgirtî" ya welat bêbingeh in û rapor li ser bingeha yekparçeyiya destûrî hatiye amadekirin.

Serokê Meclîsa Tirk herwiha sê mercên Tirkiyeyê yên ji bo Sûriyeya nû rêz kirin: avakirina hikûmeteke ku hemû pêkhateyan dihewîne, cihgirtina komên çekdar di nava sîstema nû de û parastina yekparçeyiya axa Sûriyeyê.

Kûrtûlmûş di dawiya peyva xwe de daxwaz kir ku Tirkiye xwedî destûreke bingehîn a nû û sivîl be, ji ber ku destûra serdema darbeya 12ê Îlonê êdî bersiva hewcedariyên civakê nade.