Li Kerkûkê boriya gazê teqiya

PeyamaKurd – Îro danê sibê 21ê Sibata 2026an, li nêzîkî bajarê Kerkûkê di boriyeke gazê ya ser bi Şirketa Petrolê ya Bakur (NOC) de teqînek qewimî.

Bûyerê li stasyona bi navê AB2yê ya li gundê Bacwanê rû da û bû sedema derketina agirekî gurr. Tîmên teknîkî û yên parastina sivîl gihîştin şûna bûyerê û ji bo rêgirtina li belavbûna agir, herikîna gazê ji çavkaniya sereke zû hate qutkirin.

Li gorî agahiyên fermî, di encama vê teqînê de tu ziyanên canî yan jî birîndarî çênebûne. Tîmên agirvemirandinê piştî xebateke dijwar karîn agir bi temamî kontrol bikin û nehêlin ziyan bigihîje beşên din ên stasyonê.

Hat ragihandin ku ji ber binesaziya enerjiyê ya kevnar a li Kurdistanê, car caran bûyerên bi vî rengî diqewimin û li gorî lêkolînên destpêkê, sedema vê teqînê "kêşeyeke teknîkî" bûye.

Pisporên enerjiyê balê dikşînin ser wê yekê ku binesaziya petrol û gazê ya li Kerkûkê pêdivî bi nûjenkirineke bilez heye da ku rê li ber karesatên mezin were girtin.