تاڵیبان كۆنتڕۆڵكردنی پەنجشیری راگەیاند
پەیامی کورد … تاڵیبان كۆنتڕۆڵكردنی پەنجشیری راگەیاند
وتەبێژی تاڵیبان، كۆنتڕۆڵكردنی ویلایەتی پەنجشیری راگەیاند، بەرەی بەرخۆدانی نیشتمانیی ئەفغانستانیش ئەو بانگەشەیە رەتدەكاتەوە.
زەبیحوڵڵا موجاهید ، وتەبێژی تاڵیبان لە هەژماری تایبەتی خۆی لە تۆڕی كۆمەڵایەتی تویتەر راگەیاندراوێكی بڵاوكردەوە و دەربارەی دواین بەرەوپێشچوونەكانی پەنجشیر زانیاری خستووەتەڕوو و، نوسیوویەتی: "ویلایەتی پەنجشیر بە تەواوی فەتح كرا".
لە بەرامبەردا عەلی مەیسەم یەكێك لە وتەبێژەكانی بەرەی بەرخۆدانی نیشتمانی بە تۆڕی هەواڵی (بی بی سی) راگەیاندووە، هەواڵی كۆنتڕۆڵكردنی ویلایەتی پەنجشیری دوورە لە راستییەوە و كۆنتڕۆڵ نەكراوە و روبەڕوبونەوە بەردەوامە.
بەرەی بەرخۆدانی ئەفغانستان كە لەلایەن ئەحمەد مەسعوود-ی كوڕی وەزیری پێشووی بەرگری ئەفغانستان، ئەحمەد شا مەسعوود رابەرایەتی دەكرێت، دوای ئەوەی لە 15ی ئابدا تاڵیبان توانی كابوڵ-ی پایتەخت كۆنتڕۆڵ بكات، كۆمەڵێك داوای لە تاڵیبان هەبوو بەڵام دانوستانەكانی نێوانیان نەگەیشتە ئەنجام، دواتە هێزە چەكدارەكانی تاڵیبان هێرشیان كردە سەر ویلایەتەكە.