ناڕوونیی چارەنووسی چالاکێکی ژینگەپارێزی کورد
پەیامی کورد … ناڕوونیی چارەنووسی چالاکێکی ژینگەپارێزی کورد
ژینگەپارێزێکی خەڵکی تەنگیسەر سەر بە شاری سنە بە ناوی “فەرهەنگ عەیوەزی”، زیاتر لە حەوتوویەکە لەلایەن هێزە ئیتلاعاتییەکانەوە دەسبەسەر کراوە و چارەنووسی نادیارە.
سەرەڕای تێپەڕینی ٨ ڕۆژ بەسەر دەسبەسەرکرانی فەرهەنگ عەیوەزی، چالاکی مەدەنی و ژینگەپارێزی خەڵکی تەنگیسەر سەر بە شاری سنە، هیچ زانیارییەک لەسەر چارەنووس و شوێنی ڕاگیرانی لەبەردەستدا نییە و بەدواداچوونەکانی بنەماڵەکەی لەو پێوەندییەدا بێئاکام ماوەتەوە.
ئەم چالاکە ژینگەپارێزە لەماوەی ٨ ڕۆژی ڕابردوودا هیچ پێوەندییەکی لەگەڵ بنەماڵەکەی نەبووە و هەر ئەمەش بووەتە هۆی بەپەرۆش بوونی بنەماڵەکەی.
فەرهەنگ عەیوەزی تەمەن ٣٠ ساڵ و خەڵکی تەنگیسەر، ڕۆژی یەکشەممە ٢١ی سەرماوەزی ١٤٠٠ی هەتاوی لەلایەن هێزەکانی ئیدارەی ئیتلاعات لە ماڵی خۆیان بەبێ پیشاندانی هیچ جۆرە بەڵگەیەکی قەزایی دەسبەسەر کراوە و هەتا ئێستا هۆکاری دەسبەسەرکران و ئەو تۆمەتانەی کە خراونەتە پاڵ ناوبراو ڕوون نییە.
جێگای ئاماژەیە کە ئەم چالاکە مەدەنی و ژینگەپارێزە لەماوەی ساڵانی ڕابردوودا چەندین جار بانگی ناوەندە ئیتلاعاتییەکانی ڕێژیم لە شاری سنە کراوە و جارێکیش بۆ ماوەی ٢٠ ڕۆژ دەسبەسەر کراوە.