ژمارەی پەنابەرانی بەریتانیا گەیشتە بەرزترین رێژەی ١٣ ساڵی رابردوو

پەیامی کورد... ژمارەی پەنابەرانی بەریتانیا گەیشتە بەرزترین رێژەی ١٣ ساڵی رابردوو


سەرباری هەموو ئەو رێوشوێن و رێکارانەی حکومەتی بەریتانیا بۆ سنووردارکردنی کۆچبەرانی نایاسایی دەیگرێتە بەر، ژمارەی ئەو کەسانەی داوای مافی پەنابەرێتییان لەو وڵاتە کردووە گەیشتووەتە بەرزترین رێژەی چەندین دەیەی رابردوو و لە ئێستادا ١٧٥ هەزار کۆچبەر چاوەڕیی وەڵامدانەوەی داواکاری مافی پەنابەرێتین.



بەپێی نوێترین ئاماری وەزارەتی ناوخۆی بەریتانیا، ژمارەی ئەو کەسانەی لە ئێستادا چاوەڕیی وەرگرتنی مافی پەنابەرێتین گەیشتووەتە ١٧٥ هەزار و ٣٧٥ کەس و ئەوەش بەرزترین رێژەیە لە ساڵی ٢٠١٠ەوە.



بەرزترین رێژەی داواکاری مافی پەنابەرێتی لە لە ساڵانی رابردووی بەریتانیا ٨٩ هەزار و ٢٣١ داواکاری بووە و لەمساڵدا ئاستێکی پێوانەیی تۆمارکردووە، بە شێوەیەک لە ماوەی حەوت مانگی سەرەتای ئەمساڵ گەیشتووەتە ١٣٩ هەزار و ٩٦١ کەس واتە بە رێژەی ٥٧٪ زیادی کردووە.

پرسی کۆچبەر و پەنابەران لە وڵاتی بەریتانیا هەمیشە بابەتی گەرم و گرنگی حکومەتەکانی ئەو وڵاتە بووە. تەنانەت ئەو پرسە یەکێک بوو لە هۆکار و پاڵنەرە سەرەکیەکانی دەرچوونی بەریتانیا لە یەکێتیی ئەوروپا.

سەرباری بەڵێنی حکومەتە جیاوازەکانی ئەو وڵاتە بۆ کەمکردنەوەی رێژەی کۆچبەر و پەنابەران، بەڵام بەپێی ئامارەکەی وەزارەتی ناوخۆی وڵاتەکە رێژەی کەیسی پەنابەری لەو وڵاتە هیچکات بە ئەندازەی ئێستا بەرز نەبووە.