کوژرانی دوو هەزار منداڵی چەکداری حووسی لە ماوەی یەک ساڵدا لەو وڵاتە

پەیامی کورد... کوژرانی دوو هەزار منداڵی چەکداری حووسی لە ماوەی یەک ساڵدا لەو وڵاتە

میلیشیا حووسییەکانی یەمەن بە پێشێلکردنی ڕێککەوتنی ڕێکخراوی نەتەوە یەکگرتووەکان، بەردەوامن لە بارهێنان و چەکدارکردنی منداڵان و ناردنیان بۆ بەرەکانی شەڕ.

هەواڵدەریی ئاسۆشەیتێد پرێس، ڕۆژی هەینی ٢٧ی جۆزەردانی ١٤٠١ی هەتاوی لە زاری دوو بەرپرسی باڵای میلیشیا حووسییەکانی یەمەنەوە لە ڕاپۆرتێکدا نووسی: لە ماوەی دوو مانگی ڕابردوودا سەرەڕای ڕاگەیاندنی ئاگربەستی ڕێکخراوی نەتەوەی یەکگرتووەکان لە نێوان حووسییەکان و دەوڵەتی یاسایی یەمەن، بە سەدان منداڵی تەمەن ١٠ تا ١٢ ساڵانیان بۆ ڕاهێنانی سەربازیی و مەشق پێکردن بار هێناوە و چەکداریان کردووە لە بەرەکانی شەڕدا جێگیر کراون.

ئەو دوو بەرپرسە حووسییە کە هەواڵدەریی ئاسۆشەیتێدپرێس بە توندڕەویان ناودەبا و نەیانویستووە کە ناویان ئاشکرا بێ، سەبارەت بە چەکدارکردنی منداڵانی تەمەن ١٠ تا ١٢ ساڵان ڕایانگەیاندووە کە، ئەو کارە هیچ جۆرە کێشەیەکی نییە و منداڵانی تەمەن ١٠ ساڵ بە پیاو دێنە هەژمار و دەبێت فێر بن کە لە خاکی خۆیان بەرگری بکەن.

جێگەی ئاماژەیە کە میلیشیا حووسییەکانی سەر بە ڕژێمی ئێران لە یەمەن بەناوی ئوردووی هاوینە منداڵانی تەمەن ١٠ بۆ ١٢ ساڵان دەبن و ڕاهێنانی سەربازییان پێ دەکەن و پاش ماوەیەک دەیاننێرنە بەرەکانی شەڕ و بەو جۆرە بەردەوامن لە پێشێلکردنی مافی منداڵان لە یەمەن.

ڕێکخراوی نەتەوە یەکگرتووەکان لە ڕاپۆرتێکدا لەسەر پێشێلکارییە مرۆیییەکانی میلیشیا حووسییەکانی یەمەن دەنووسێ: لەناوی یەک ساڵدا ٢هەزار منداڵ لە بەرەکانی شەڕدا گیانیان لەدەستداوە کە ئەمە کارەسات و پێشێلکردنی ئاشکرای مافی منداڵانە لەلایەن میلیشیا حووسییەکانی یەمەنەوە.