حکوومەتی هەرێمی کوردستان لە ساڵیادی ئەنفالدا پەیامێکی بڵاو کردەوە
پەیامی کورد … حکوومەتی هەرێمی کوردستان لە ساڵیادی ئەنفالدا پەیامێکی بڵاو کردەوە
حکوومەتی هەرێمی کوردستان پەیامێکی بەبۆنەی ٣٣یەمین ساڵوەگەڕی پاکتاو و جینۆسایدی گەلی کوردستان لە لایەن ڕژێمی لەناوچووی بەعسەوە بڵاوکردەوە.
ئەمڕۆ چوارشەممە ١٤ی نیسانی ٢٠٢١،، حکوومەتی هەرێمی کوردستان لە پەیامێکیدا کە بەبۆنەی ٣٣یەمین ساڵوەگەڕی ئەنفال بڵاویکردووەتەوە و تێیدا رایگەیاندووە: "بە خۆشییەوە ئێستا گەلی کوردستان ماوەتەوە و دیکتاتۆر و بکەرانی ئەنفال لەنێو چوونە، ئەمەش نیشانەی زیندوویەتی نەتەوەکەمان و شکستی پیلانی دوژمنانە".
دەقی پەیامەکە بە شێوەی خوارەوەیە؛
ئەمڕۆ سی وسێ ساڵ بەسەر پاکتاو و جینۆسایدی گەلی کوردستان لە لایەن ڕژێمی لەناوچووی بەعسەوە تێدەپەڕێت کە بە چەند قۆناغێک و لە ژێر ناوی ئەنفال هەزاران کەسیان زیندەبەچاڵ کرد.
بۆیە لەم ڕۆژەدا سەری نەوازش بۆ شەهیدبوونی هەزاران کەس دادەنەوێنین کە ڕووبەڕووی نەگریسترین و دڕندانەترین کۆمەڵکوژی ناوچەکە و جیهان بوونەوە.
بە خۆشییەوە ئێستا گەلی کوردستان ماوەتەوە و دیکتاتۆر و بکەرانی ئەنفال لەنێو چوونە، ئەمەش نیشانەی زیندوویەتی نەتەوەکەمان و شکستی پیلانی دوژمنانە.
حكومەتی هەرێمی كوردستان تا ئێستا چی لە توانادا بووبێت دریغی نەکردووە بۆ بنەماڵەی قوربانیانی ئەنفال و بەردەوامیش دەبێت لە خزمەتی زیاتریان و داواکردنی ماف و قەرەبووی ماددی و مەعنەوییان لە حكومەتی فیدراڵی عێراق.
سڵاو لە گیانی پاكی شەهیدان و قوربانیانی ئەنفال
د. جوتیار عادل
گوتەبێژی حکومەتی هەرێمی کوردستان
14ی نیسانی 2021
هەواڵە گرنگەکان
هەواڵە پەیوەندیدارەکان
هێشتا لێدوان نییە. یەکەمین لێدوان بنووسە!
لێدوانی خۆت بنووسە