وەزارەتی خوێندنی باڵای هەرێمی کوردستان سێ ڕۆژ ماتەمینی ڕاگەیاند
پەیامی کورد... وەزارەتی خوێندنی باڵای هەرێمی کوردستان سێ ڕۆژ ماتەمینی ڕاگەیاند
بەهۆی کوشتنی هەریەک لە کاوان ئیسماعیل ڕاگری کۆلێژی یاسای زانکۆی سەڵاحەدین و ئیدریس حەمە خان مامۆستای کۆلێژی ئەندازیاری لە هەمان زانکۆ، وەزارەتی خوێندنی باڵا و توێژینەوەی زانستی ماتەمینی سەرتاسەری لە سەرجەم زانکۆ و دامەزراوە زانستییەکان ڕاگەیاند و چەند بڕیارێکیش لەبارەی بۆنە و چالاکییە زانستییەکان لە زانکۆ حکومی و تایبەتەکانی هەرێمی کوردستان دەردەکات.
بەگوێرەی ڕاگەیەنراوێک، بە ئامادە بوونی ئارام محەممەد قادر وەزیری خوێندنی باڵا و توێژینەوەی زانستی ڕێوڕەسمێکی ماتەمینی بەڕێوەچوو لەو بارەوە وەزیری خوێندنی باڵا ڕایگەیاند: دوو مامۆستا و ئەکادیمی بەتوانا و شارەزا و لێهاتووی زانکۆی سەڵاحەدین لە ڕووداوێکی چاوەڕواننەکراو و نەخوازراودا شەهید کران، بەتوندی ئیدانەی ئەم جۆرە دەست درێژیانە دەکەین و لەپێناو سەروەری یاساو پاراستنی حەرەمی زانکۆکان هەموو ڕێکارێکی یاسایی دەگرینە بەر، هیواشمان وا یە هەموو مامۆستایان و خوێندکاران و کۆمیونیتی ئەکادیمی زانکۆکان پێکەوە هەماهەنگ بن بۆ ئەوەی ببینە بەربەست و نەهێڵین ئەم دیارەدە دزێوانە بپەڕنەوە ناو حەرەمی زانکۆکانمان و پەرە بسێنێت.
ئارام محەممەد وتیشی: زانکۆکان و دامەزراوە زانستییەکانی ڕاسپاردوە بە داگرتنی ئاڵای وەزارەت و زانکۆکان و دامەزراوە زانستییەکانی هەرێمی کوردستان بۆ ماوەی سێ ڕۆژ و ڕاگرتنی سەرجەم چالاکییە زانستییەکان و مەراسیم و بۆنە و ئاهەنگەکانی دەرچون لە سەرجەم زانکۆکانی حکومی و تایبەت بۆ ماوەی سێ ڕۆژ.