بریندار بوونی سێ کۆڵبەر لە سنوورەکانی ڕۆژهەڵات

پەیامی کورد ... بریندار بوونی سێ کۆڵبەر لە سنوورەکانی ڕۆژهەڵات

هێزە چەکدارەکانی ئێران لە سنوورەکانی نەوسوود سەر بە پارێزگای کرماشان تەقەیان لە کۆڵبەران کردووە و سێ کۆڵبەر بریندار بوون.

بەپێی ڕاپۆرتێکی ڕێکخراوی مافی مرۆڤی هەنگاو، ڕۆژی چوارشەممە ٥ی خەرمانانی ٢٧٢٠ (٢٦ی ئاگۆستی ٢٠٢٠)، هێزە چەکدارەکانی ئێران لە سنوورەکانی نەوسوود تەقەیان لە پۆلێک کۆڵبەر کردووە و لە ئاکامی دەستڕێژی ئەو هێزانە سێ کۆڵبەر بە سەختی بریندار بوون.

هەواڵنێری هەنگاو لە نەوسوود ناسنامەی ئەو سێ کۆڵبەرەی ”قانێع بەهرامی“ تەمەن ٢٧ ساڵ و خەڵکی سەلاسی باوەجانی، عەلی ڕەنجبەر خەڵکی گوندی میانەی مەریوان و کۆڵبەرێک بە ناوی ”ناجی“ خەڵکی گوندی ”وسنە“ی مەریوان ڕاگەیاندووە.

ئەو سێ کۆڵبەرە بە مەبەستی چارەسەریی پزیشکی ڕەوانەی ناوەندە دەرمانییەکانی شاری پاوە کراون.