بەهۆی ڕووداوێکی تەقەکردن لە شیکاگۆ ٣٧ کەس کوژراو برینداربوون

پەیامی کورد... بەهۆی ڕووداوێکی تەقەکردن لە شیکاگۆ ٣٧ کەس کوژراو برینداربوون

کەسێک لە ویلایەتی شیکاگۆ تەقەی بەناو نمایشکارانی بۆنەی ڕۆژی سەربەخۆیی کرد و بە هۆیەوە ٦ کەسی کوشت و ٣١ی تری بریندار کرد.

سەرچاوەکانی هەواڵی ئەمریکا بڵاویان کردووەتەوە، لەسەر یەکێک لە تەلارەکانەوە گەنجێک تەقەی بەناو نمایشکارانی ڕۆژی سەربەخۆیی کردووە لە ویلایەتی شیکاگۆ و ئاژاوە دروست بووە و ئامادەبووان هەڵاتوون.

ڕوونیش کراوەتەوە، بەهۆی ئەوەشەوە ٦ کەس گیانیان لەدەستداوە و ٣١ی تر بریندار بوون و گوازراوانەتەوە بۆ نەخۆشخانە بۆ چارەسەر.

بەپێی زانیارییەکان، تۆمەتبارەکە نزیکەی ٦٠ گوللەی تەقاندووە و هەڵاتووە، دوای ڕووداوەکەش سەدان ئەندامی هێزەکانی پۆلیس گەڕان و پشکنینیان بەدوای تەقەکەرەکەدا دەستپێکردووە و دۆزراوەتەوە، کەسێکە ناوی «ڕۆبێرت کریمۆ» یە و تەمەنی ٢٢ ساڵە و ئۆتۆمبێلێکی جۆری هۆندای ٢٠١٠ی لێخوڕیوە.