به‌له‌مێكی دیكه‌ی كۆچبه‌ران له‌ ده‌ریای ئیجه‌ ژێرئاو كه‌وت

به‌له‌مێك له‌ ده‌ریای ئیجه‌ له‌ یۆنان ژێرئاو كه‌وتووه‌ و 25 كه‌س ڕزگار كران و ته‌رمی كه‌سێكیش دۆزراوەته‌وه‌.

ئەمڕۆ دووشەممە 29-4-2024 ده‌زگای لووتكه‌ بۆ كاروباری ئاواره‌ و په‌نابه‌ران بڵاویكردەوە،"دره‌نگانی شه‌وی یه‌كشه‌ممه‌ی ڕابردوو بەلەمێک لە ناوچەی دەریای ئاگیۆس ئیسیدۆرۆس لە باکووری ڕۆژئاوای کارلۆڤاسی، سامۆس له‌ژێرئاودا دۆزرایەوە و 25 کۆچبەری تێدا ڕزگار کران و تەرمێکیش دۆزراوەتەوە".

ئاماژە بەوەش دراوە،"پێشبینی دەکرێت ژمارەیەک کۆچبەریش بێسەروشوێن بن و تا ئێستا بە ته‌واوه‌تی ژمارەیان نه‌زاندراوه‌".

بەپێی بەدواداچونەکانی ده‌زگاكه‌،"ئه‌وانه‌ی ڕزگاركراون نه‌زانراوه‌ خه‌ڵكی كام وڵاتن و کەسە کۆچكردووه‌كه‌ش تا ئێستا ناسنامه‌ی نازاندرێت".

ئەوەش خرواەتەڕوو،"پاسەوانی کەناراوەکان تەنیا بەڕێکەوت لە ناوچەکەدا بوون و لە کاتی ڕووداوەکەدا کۆچبەرەکان هیچ پەیوەندییەکیان بە ژمارە 112ـه‌وه‌ نەکردووە".

ئەوەش هاتووە،"تا ئێستا لێکۆڵینەوە بەردەوامە و چاوەڕێ دەکرێت کە ڕزگاربووان بارودۆخیان ئاسایی بێتەوە بۆئه‌وه‌ی له‌باره‌ی ڕووداوه‌كه‌وه‌ زانیارییان لێ وه‌ربگیرێت".