سوپای ئیسرائیل "سەرۆک وەزیرانی نوێی حەماس لە غەززە" لە هێرشکردنە سەر نەخۆشخانەی ناسر كوشت

پەیامی کورد   ...   سوپای ئیسرائیل "سەرۆک وەزیرانی نوێی حەماس لە غەززە" لە هێرشکردنە سەر نەخۆشخانەی ناسر كوشت

ئیسرائیل کاتز، وەزیری بەرگری ئیسرائیل ڕایگەیاند، ڕۆژی یەکشەممە ٢٣ی مارس ، سوپای ئەو ووڵاتە لە ئۆپراسیۆنێکی ئامانجداردا لە نەخۆشخانەی ناسر لە خان یوونس، ئیسماعیل بەرهووم، سیمای دیاری گرووپی تیرۆریستی حەماس و "سەرۆکوەزیرانی نوێی غەززە"یان كوشتووە.

کاتز لە لێدوانەکەیدا ستایشی ووردبینی و کارایی هێرشەکەی کرد و ڕایگەیاند کە ئۆپراسیۆنە سەربازییەکان دژی پێگەکانی حەماس لە کەرتی غەززە چڕتر دەبێتەوە و ئەم پرۆسەیە بەردەوام دەبێت تا هەموو بارمتەکان ئازاد دەکرێن.

هەروەها سەرچاوە پزیشکییەکان بە ئاژانسی (ڕۆیتەرز)یان ڕاگەیاندووە، بەهۆی بۆردومانەکەوە لانی کەم پێنج کوژراو و ژمارەیەک برینداری لێکەوتووەتەوە. 

بە پێی ڕاپۆرتی ماڵپەڕی تایمزی ئیسرائیل، ئیسماعیل بەرھووم ئەندامێکی باڵای مەکتەبی سیاسی حەماس بووە و یەکیتی ئەورووپاش لە ساڵی ڕابردوودا ناوبراوی بەهۆی ڕۆڵی لە دابینکردنی دارایی چالاکییەکانی ئەو گرووپە تیرۆریستییە، خستووەتە لیستی گەمارۆوەكانی خۆیەوە.