نرخی نەوت بەرزبوونەوەیەکی بەرچاوی بە خۆیەوە بینی

پەیامی کورد... نرخی نەوت بەرزبوونەوەیەکی بەرچاوی بە خۆیەوە بینی

دوای ئەوەی لە چەند ڕۆژی ڕابردوودا نرخی نەوتی خاو بە شێوەیەکی بەرچاو دابەزی، بەشێکی زۆری نرخەکەی بەدەستهێناوەتەوە و یەک بەرمیل خاوی برێنت بە ١١١ دۆلار و ٥٠ سەنتەوە مامەڵەی پێوە دەکرێت.

بەپێی داتاکان لە بازاڕەکانی مامەڵە کردن بە نەوتی خاوەوە، بەیانی ئەمڕۆ شەممە نرخی یەک بەرمیل خاوی برێنت بەرامبەر ١١١ دۆلار و ٥٠ سەنت بووە، هەروەها بەرمیلێک خاوی تێکساسی ئەمریکی بە ١١٠ دۆلار و ٥٠ سەنت فرۆشراوە.

بەپێی هەمان ئەو داتایانە، نرخی یەک بەرمیل خاوی ڕێکخراوی ئۆپێک بە ١٠٩ دۆلار و ٣٠ سەنتەوە مامەڵەی پێوە دەکرێت.

لە چەند ڕۆژی ڕابردوودا نەوتی خاو بە شێوەیەکی بەرچاو ڕووی لە دابەزین کرد، بەڵام بەهۆی داتاکانی ڕێکخراوی ئۆپێک کە ئاشکرای کرد، لە مانگی نیسانی ڕابردوودا ڕۆژانە ٢ ملیۆن و ٧٠٠ هەزار بەرمیل نەوت کەمتر بەرهەمهێنراوە نرخەکەی دەستی بە بەرزبوونەوە کرد، ئەوەش بەهۆی ترس لەسەر کەمبوونەوەی نەوت لە بازاڕەکاندا.