سکرتێری گشتیی ناتۆ سەردانی تورکیا دەکات

پەیامی کورد... سکرتێری گشتیی ناتۆ سەردانی تورکیا دەکات


بەپێی پلانی ناوەندی راگەیاندنی ناتۆ، یانس ستۆڵتنبێرگ، سکرتێری گشتیی ناتۆ لە رۆژانی 3-5ی تشرینی دووەمی 2022 لە تورکیا دەبێت و زنجیرەیەک دیدار و کۆبوونەوە لەگەڵ بەرپرسانی تورکیا و ناتۆ دەکات.

بەگوێرەی پلانەکە، ئەمڕۆ پێنجشەممە یانس ستۆڵتنبێرگ، سکرتێری گشتیی ناتۆ لەگەڵ مەولوود چاوشئۆغڵو، وەزیری دەرەوەی تورکیا کۆدەبێتەوە و کۆنگرەیەکی رۆژنامەوانیی هاوبەش ئەنجام دەدەن و رۆژی دواتر 4-11-2022 لەگەڵ رەجەب تەیب ئەردۆغان، سەرۆککۆماری تورکیا کۆدەبێتەوە. هەر لە سەردانەکەی تورکیایدا دەچێتە پارێزگای چاناککالێ و لەگەڵ هێزەکانی ناتۆ و فەرماندە سەربازییەکانی تورکیا-ی ناتۆ کۆدەبێتەوە.

لە راگەیێندراوەکەی ناوەندی راگەیاندنی ناتۆ هاتووە: ستۆڵتنبێرگ لەگەڵ بەرپرسانی تورکیا گفتوگۆ لەبارەی پرۆسەی ئەندامێتیی سوێد و فینلاند و جەنگی رووسیا-ئۆکراینا، پەیوەندییەکانی تورکیا-ناتۆ و چەندین بابەتی پەیوەندیدار و هاوبەش دەکات.

رۆژی 1-11-2022 یانس ستۆڵتنبێرگ سکرتێری گشتیی ناتۆ بە تەلەفۆن قسەی لەگەڵ هەریەک لە سانا مارین، سەرۆکوەزیرانی فینلاند و ئوڵف کریستێرسۆن، سەرۆکوەزیرانی سوێد کردووە ، بڕیاریشە رۆژی 8ی تشرینی دووەمی 2022، ئوڵف کریستێرسۆن سەرۆکوەزیرانی سوێد سەردانی تورکیا بکات و لەگەڵ رەجەب تەیب ئەردۆغان لەبارەی ئەندامێتیی وڵاتەکەی لە ناتۆ گفتوگۆ بکات.