سەرۆکوەزیران " نێچیرڤان بارزانی " ڕۆژی جیهانی ئافرەتان لە هاوسەرەکەی و هەموو ژنانی کورد و جیهان پیرۆز دەکات
پەیامی کورد ... سەرۆکوەزیرانی هەرێمی کوردستان لەساڵڕۆژی 8ـی مارس رۆژی جیهانی ژنان پەیامێکی ڤیدیۆیی بڵاوکردەوە و دەڵێت، ئافرەتی بەهێز و ئازا هەمیشە لەنێو ئێمەدا بووە. هەروەها ئەنجوومەنی وەزیرانیش پەیامێک بڵاودەکاتەوە و رایدەگەیێنێت، مایەی شانازییە کە ئافرەتانی کوردستان هەمیشە بەشدارییەکی کاریگەریان لە بوارە جیاکانی خەبات و تێکۆشاندا هەبووە.
نێچیرڤان بارزانی، سەرۆکوەزیرانی هەرێمی کوردستان لە پەیامێکی ڤیدیۆییدا پیرۆزبایی هەشتی مارس لە ژنانی کوردستان دەکات و دەڵێت: "ئەمڕۆ لە رۆژی جیهانی ئافرەتاندا، سڵاو لە هەموو ئافرەتانی کوردستان. ئافرەتی بەهێز و ئازا هەمیشە لەنێو ئێمەدا هەبووە، ئەمڕۆ دەمەوێت سوپاسێکی تایبەتی هاوسەرەکەم و هەموو ئافرەتانی کوردستان بکەم".
هەروەها لە پەیامێکی دیکەدا ئەنجوومەنی وەزیرانی هەرێمی کوردستان، هەشتی مارس لە ژنانی کوردستان پیرۆزدەکات و رایدەگەیێنێت، ئەرکی هەموو کەس و گرووپ و لایەنێکی کوردستانییە، بەتایبەتیش دەستەبژێران، پشتیوانی لە پرسی یەکسانی و چەسپاندنی بنەماکانی بکەن لەپێناو ژیانێکی پڕ بەهای جوانی مرۆڤدۆستانە و کۆمەڵگهیەکی لێبووردەی یەکسانیخواز و ئاییندەیەکی گەشدا.
دەقی پەیامەکەی ئەنجوومەنی وەزیران بۆ رۆژی هەشتی مارس
٨ی مارس، ڕۆژێکی پرشنگدارە لە یادەوریی مرۆڤایەتیدا، یادکردنەوەی ئەم ڕۆژە، ڕێزگرتنە لە خەباتی زیاتر لە سەدە و نیوێکی ئافرەتان و یەکسانیخوازان، لەپێناو یەکسانی و دادپەروەریی کۆمەڵایەتیدا. لەم یادە شکۆدارەدا گەرمترین پیرۆزبایی ئاراستەی سەرجەم ئافرەتانی کوردستان و جیهان دەکەین.
مایەی شانازییە کە ئافرەتانی کوردستان هەمیشە بەشدارییەکی کاریگەریان لە بوارە جیاکانی خەبات و تێکۆشاندا هەبووە. خانمان هەمیشە قوربانیى سەرەکیی تووندوتیژی، لە سەرووى هەمووشیانەوە توندوتیژییەکانی جەنگ و ئەو کارەساتانه بوون كه بەسەر گەلەکەماندا هاتوون، هەر لە ئەنفال و کیمیابارانەوە تا شاڵاوی نامرۆڤانەی تیرۆریستانی داعش دەرهەق بە خانمانی ئێزدیمان لە شهنگال، بەڵام هیچ ڕووداوێکی کارەساتهێن نەیتوانیوە لە شکۆی ئافرەتی کوردستانی و ورەیان بۆ ژیان، خهبات و سەرفرازی، کەم بکاتەوە.
حكوومەتی هەرێمی كوردستان هەمیشە بە پەرۆشەوە، وەك پرەنسیپێكی چەسپیوی مافەكانی مرۆڤ و دیموكراسی لە كەیسی یەكسانی و مافی ئافرەتانی ڕوانیوە. وێڕای هەبوونی دەستە و دامەزراوەی حكوومیی تایبەت بە ئافرەتان و داكۆكیكار لە مافەكانیان، دۆخێكی لەباریش ڕەخسێنراوە بۆ کار و تێكۆشانی ڕێكخراوە ناحکوومییە تایبەتمەندەکانی بواری ژنان و مافەكانیان.
ژنان ڕۆڵێكى سهرهكییان له كهرتى پهروهردهوه و پێگهیاندنى ڕۆڵهكانى ئهمڕۆ و داهاتووى گهلهكهماندا ههیه و ساڵ بهساڵ ڕۆڵیان لهم كهرته گرنگهدا زیاد دهبێت. بەرزبوونەوەی ڕێژەی خانمانی پەرلەمانتار و خاوەن پۆستە باڵا و گرنگەکان لە دامەزراوە فەرمییەکانی هەرێمی کوردستاندا، ئاماژەیەکی گرنگی بەهێزبوونی بنەماکانی یەکسانییە، ئامادەبوونی ئافرەتی کوردستانی لە بواری سەرمایەگوزاری و کەرتی تایبەتدا، هەنگاوێکی دیکەی گرنگە بۆ بەشداربوونیان لە کۆمەڵگادا و دەبێ هەوڵەکانیان لەم بوارەدا پشتیوانیی جددی لێ بکرێت و زیاتر پەرەی پێبدرێت.
ئەرکی هەموو کەس و گرووپ و لایەنێکی کوردستانییە، بەتایبەتیش دەستەبژێران، پشتیوانی لە پرسی یەکسانی و چەسپاندنی بنەماکانی بکەن لەپێناو ژیانێکی پڕ بەهای جوانی مرۆڤدۆستانە و کۆمەڵگهیەکی لێبووردەی یەکسانیخواز و ئاییندەیەکی گەشدا.
بەرز و شکۆدار بێت ساڵڕۆژی ٨ی مارس، ڕۆژی جیهانیی ئافرەتان.
سڵاو لە گیانی پیرۆزی ئەو خانمە قارەمانانەی گەلەکەمان كە لەپێناو مافە ڕەواکانی گەل و نیشتماندا گیانیان بەخشی.
سڵاو لە گیانی پیرۆزی سەرجەم شەهیدانی ڕێگای ڕزگاری و سەرفرازی.
ئهنجوومهنى وهزیرانى ههرێمى كوردستان
8ى مارسى 2019
هەواڵە گرنگەکان
هەواڵە پەیوەندیدارەکان
هێشتا لێدوان نییە. یەکەمین لێدوان بنووسە!
لێدوانی خۆت بنووسە