ئەمریكا ستایشی ئەو گورزە دەكات كە لە میلیشیاكانی عێراقیان وەشاندووە

پەیامی کورد... ئەمریكا ستایشی ئەو گورزە دەكات كە لە میلیشیاكانی عێراقیان وەشاندووە


وەزیری بەرگری ئەمریكا ستایشی ئەو گورزە دەكات لە میلیشیاكانی عێراقیان وەشاندووە و دەڵێت،"بایدن دوودڵ نابێت لە گرتنەبەری رێوشوێنی پێویست".

لوید ئۆستن وەزیری بەرگری ئەمریكا ستایشی ئەو لێهاتوویی و پیشەیبوونە دەكات كە سوپای وڵاتەكەی پیادەی كردووە لە لێدانی پێگەكانی میلیشیای حزبوڵا لە ناوچەی جورف ئەلسەخر لە بابل و قەزای قائیم لە پارێزگای ئەنبار.

ئۆستن لە بەیاننامەیەكدا راگەیاندووە،" بە فەرمانی بایدن, سوپای ئەمریكا گورزی لە سێ‌ دامەزراوە وەشاندووە, كە میلیشیای كەتائیبی حزبوڵای هاوپەیمانی ئێران و گروپەكانی تر لە عێراق بەكاریدەهێنن.

ئاماژەی بەوەشداوە،"ئەو گورزە وردانە, وەڵامێكی راستەوخۆن بۆ ئەو زنجیرە هێرشەی كراونەتە سەر كارمەندانی ویلایەتە یەكگرتووەكان و هاوپەیماننان لە عێراق و سوریا, لەلایەن میلیشیاكانی هاوپەیمانی ئێرانەوە".

ئەوەشی خستووەتەڕوو،"بایدن دوودڵ نابێت لە گرتنەبەری رێوشوێنی پێویست بۆ بەرگریكردن لە سەربازانی ئەمریكا و بەرژەوەندی ویلایەتە یەكگرتووەكان لە ناوچەكە".

دەشڵێت،"ئێمە نامانەوێت ململانێ‌ لەناوچەكە توندتربێتەوە, بەڵام بە تەواوی ئامادەین بۆ گرتنەبەری رێوشوێنی زیاتر بۆ پاراستنی گەل و دامەزراوەكانمان".

وەزیری بەرگری ئەمریكا داوا لەو گروپانە و "ئێرانی سەرپەشتیاریانن دەكات كە دەستبەجێ‌ هێرشەكانیان رابگرن.