نێچیرڤان بارزانی لەگەڵ پاتریارکی کڵێسای سریانی ئۆرتۆدۆکس كۆبووهوه
پەیامی کورد ... نێچیرڤان بارزانی لەگەڵ پاتریارکی کڵێسای سریانی ئۆرتۆدۆکس كۆبووهوه
ھەر لە چوارچێوەی بەشداریکردنی لە کۆنفرانسی ئاسایشی میوونشن دا، ئێوارەی ھەینی ٢٠٢٥/٢/١٤، نێچیرڤان بارزانی، سەرۆکی ھەرێمی کوردستان، لەگەڵ پەتریارک ئیگناتیۆس ئەفرامی دووەم، پاتریارکی کڵێسای سریانی ئۆرتۆدۆکس لە ئەنتاکیا کۆبووەوە.
ھەردوولا دۆخی مەسیحییەکان لە عێراق و سووریا و ئەو ئاستەنگانەی لە ئێستادا ڕووبەڕوویان دەبنەوە تاوتوێ کرد، ھەروەھا باسیان لە چۆنیەتی بەھێزکردنی ھەوڵەکانی ئاشتی و پێکەوەژیان لەنێوان پێکھاتە ئایینی و نەتەوەییە جیاوازەکانی ناوچەکەدا کرد.
نێچیرڤان بارزانی جەختی لەسەر گرینگی پێکەوەژیانی ئاشتیانە و پاراستنی مافەکانی مەسیحییەکان و ھەموو پێکھاتەکان کردەوە، ھەروەھا ئاماژەی بە پابەندبوونی ھەرێمی کوردستان کرد لە پشتگیریکردنی فرەیی ئایینی و کولتووری و بەھێزکردنی ژینگەیەکی لێبووردەیی و ڕێز لە یەک گرتن.
لای خۆیەوە، پەتریارک ئیگناتیۆس ئەفرامی دووەم سوپاسی ھەرێمی کوردستانی کرد بۆ پاراستن و پشتگیریکردنی مەسیحییە ئاوارە و پەنابەرەکان، ھەروەھا ستایشی ڕۆڵی ھەرێمی کوردستانی کرد وەک نموونەیەک بۆ پێکەوەژیانی ئاشتییانە لە ناوچەکەدا.
دۆخی سووریا و ئاستەنگە ھەنووکەییەکانی ناوچەکە، لەگەڵ چەند پرسێکی دیکەی جێی بایەخی ھاوبەش، تەوەرێکی دیکەی کۆبوونەوەکە بوو.
هەواڵە گرنگەکان
هەواڵە پەیوەندیدارەکان
هێشتا لێدوان نییە. یەکەمین لێدوان بنووسە!
لێدوانی خۆت بنووسە