ژنە دادوەر و کەسایەتییەکی ناسراوی کورد دواییکرد

پەیامی کورد...ژنە دادوەر و کەسایەتییەکی ناسراوی کورد لە وڵاتی ئەمریکا کۆچی دواییکرد.

خاتوو زەکیە ئیسماعیل حەقی، ژنە کوردی فەیلی لە نەخۆشخانەیەکی ئەمریکا و لە تەمەنی 86 ساڵیدا، کۆچی دوایی کرد.

ئەو ژنە کوردە، کە لە خێزانێکی ناسراوی فەیلی لە بەغدا لەدایکبووبوو، یەکەم ژنە دادوەر بوو لە عێراق و تەواوی وڵاتانی عەرەبی.

خاتوو زەکیە ئیسماعیل، لە ساڵی 1957 زانکۆی مافی لە بەغدا تەواوکرد و لە ساڵی 1959 وەک یەکەم ژنە دادوەر لە دادگای شەرعیی بەغدا، دەستبەکاربوو.

هەروەها زەکیە ئیسماعیل، یەکێکە لە دامەزرێنەرانی یەکێتیی ئافرەتانی کوردستان و لە کاتی دامەزراندنیەوە لە ساڵی 1952 تا ساڵی 1975، سکرتێری ئەو رێکخراوە بوو، کە رێکخراوێکی جەماوەریی پارتی دیموکراتی کوردستانە.

ئەو ژنە دادوەر و سیاسەتمەدارە کوردە فەیلییە لە ساڵی 1970 و لە کۆنگرەی هەشتەمی پارتی، بە ئەندامی کۆمیتەی ناوەندیی پارتی هەڵبژێردرا.