"بۆ هەڵبژاردنی پەرلەمانی کوردستان کارتی بایۆمەتری بەکارنایەت"

بەوتەی بەرپرسێكی كۆمسیۆنی هەڵبژاردن و راپرس، بۆ هەڵبژاردنی پەرلەمانی كوردستان كارتی بایۆمەتری بەكارناهێنرێت.

لە كۆنگرەیەكی رۆژنامەوانیدا شۆڕش حەسەن، بەڕێوەبەری گشتی و پەیوەندییەكان لە كۆمسیۆنی باڵای سەربەخۆی هەڵبژاردن و راپرسی  ئاشکرایکرد، کە بۆ هەڵبژاردنی پەرلەمانی كوردستان كارتی بایۆمەتری بەكارنایەت، بەڵكو بەپێی بەڵگەنامەی كەسییەكان دەبێت كە ئەوان لەداهاتوودا و لە هەڵمەتێكی بانگەشە جۆری بەڵگەكان دەخەنەڕوو.

باسی لەوەشکرد، کە لە ئەمڕۆوە تۆماركردنی قەوارە سیاسییەكان دەستی پێكردووە و تا (٧)ی حوزەیران تۆماركردن بەردەوام دەبێت و ئەوانەی رێگە پێدراون دەتوانن فۆرمەكان پڕبكەنەوە.

لەبارەی جۆری هەڵبژاردنی داهاتووەوە، ئەو بەرپرسەی کۆمسیۆن وتی، "تائێستا یاساكە وەكو خۆیەتی و كوردستان یەك بازنە و لیستی نیمچە كراوەیە، بۆ ئەگەری ساختەكاریش، ئەو بەرپرسەی كۆمسیۆن جەختیكردەوە هەموو رێوشوێنێك بۆ رێگری ساختەكردن دەگرنەبەر.

ئەوەش لەکاتێکدایە، کە بڕیارە (٣٠)ی ئەیلولی ئەمساڵ هەڵبژاردنی خولی پێنجەمی پەرلەمانی كوردستان ئەنجام بدرێت.