ئەمەریکا بە بەهای زیاتر لە دوو ملیار دۆلار تانکی ئابرامز بە بەحرێن دەفرۆشێت
ئەمەریکا فرۆشتنی تانکی پێشکەوتوی ئابرامز بە بەحرێنی پەسند کرد و بڕیاری دا بایی دوو ملیار و 200 ملیۆن دۆلار ئەم جۆرە تانکانەی پێ بفرۆشێت.
وەزارەتی دەرەوەی ئەمەریکا بڵاوی کردەوە، کۆنگرێسی لەوە ئاگادار کردووەتەوە، ئامادەن 50 تانکی ئابرامز بە بەحرێن بفرۆشێت، بەحرێن وڵاتێکە کە پێوەندییەکی ئاڵۆز و پڕکێشەی لەگەڵ ئێراندا هەیە.
ئاماژەی بەوەش كردووە، ئەو جۆرە تانکانە توانای بەحرێن بۆ رووبەڕووبوونەوەی هەر جۆرە هەڕەشە و مەترسییەک لە داهاتوودا بەرز دەکاتەوە و بەحرێن لەمەودوا دەتوانێت لە ئۆپڕاسیۆنە ناوچەییەکان شان بە شانی ئەمەریکا بەشداری بکات.
پێویستە بگوترێ بەحرێن بە پێنجەم بنکەی گرنگی سەربازیی ئەمەریکا لە ناوچەکە هەژمار دەکرێت و بۆ ئەمەریکا بە یەکێک لە گرنگترین هاوپەیمانەکان لە دەرەوەی ناتۆ دادەنرێت.
تانکی ئابرامز لە پێشکەوتووترین و قورسترین جۆرەکانی تانکن لە دنیادا کە بە چەکێکی سەرەکیی سوپای ئەمەریکاش هەژمار دەکرێت.