فەیسبووک: ئێران و ڕوسیا گەورەترین سەرچاوەکانی هەواڵی ناڕاست و درۆ بوون

پەیامی کورد …. فەیسبووک: ئێران و ڕوسیا گەورەترین سەرچاوەکانی هەواڵی ناڕاست و درۆ بوون

لە ڕاپۆرتی ساڵانەی فەیسبووکدا هاتووە کە ئێران لەپاش ڕوسیا، گەورەترین سەرچاوەی هەواڵی درۆ، ناڕاست و چەواشەکارانەیە.

تۆڕی کۆمەڵایەتیی فەیسبووک کە خاوەن ٢.٨٤ میلیارد بەکارهێنەرە، ڕاپۆرتی ساڵانەی خۆی بڵاو کردەوە کە تێیدا باس کە بلاک کردنی ١٥٠ ئەکاونتی ساختە و ناڕاست لە ماوەی نێوان ساڵەکانی ٢٠١٧ تاکوو ٢٠٢٠ دەکات.

لەو ڕاپۆرتەدا ناوی کۆماری ئیسلامیی ئێران وەکوو یەکێک لە گەورەترین بنکەکانی بڵاوکردنەوەی درۆ و هەواڵی ناڕاست و دژەزانیاری هاتووە کە بەردەوام هەنگاوی بۆ بەئامانج کردنی ڕای گشتی هەڵهێناوە.

لەو ڕاپۆرتەدا سەبارەت بە کاریگەریی بڵاوکردنەوەی هەواڵی درۆ و چەواشەکارانە لەسەر کۆمەڵگەی ئامریکا هاتووە: "کۆمەڵێک دەستی دەرەکی هەوڵیان داوە خۆیان بە گرووپە ناوخۆییەکان ببەستنەوە و سنووری نێوان پرسە ناوخۆیی و دەرەکییەکانی ئامریکا کاڵ بکەنەوە."

لە بەشێکی ئەو ڕاپۆرتەدا کە تایبەت بە قەبارەی دەیتا هەڵەکانە، پێداگری کراوە کە ئەو سەرچاوەگەلەی پەیوەندییان بە ڕوسیا و ئێرانەوە هەیە، زۆرترین پشکیان لە بەلاڕێدابردن و چەواشەکاری بەرکەوتووە. لەم بوارەدا، ناوی کۆماری ئیسلامی بە ٢٣ کاناڵ و هەروەها ناوی ڕووسیە بە ٢٧ کاناڵەوە هاتووە.

فەیسبووک دەڵێ ئەگەرچی ئەوان ڕاستەوخۆ دەوڵەتەکان بە بەرپرسیار دانانێن بەڵام زانیارییەکانیان دەریخستووە کە زۆربەی هەوڵەکان لە جۆری "کاریگەریی هەواڵگری" بوونە.