ڕووداوێکی هاتووچۆ لە تورکیا 43 قوربانی لێکەوتەوە

پەیامی کورد... ڕووداوێکی هاتووچۆ لە تورکیا 43 قوربانی لێکەوتەوە


وەزیری تەندروستیی تورکیا ئاشکرایکرد لە ڕووداوێکی زنجیرەیی هاتووچۆدا لە شارۆچکەی ئانتاکیا سەر بە هاتای، 12 کەس گیانیان لەدەستداوە و 31 کەسیش برینداربوون کە برینی سێیان سەختە.

فەخرەددین کۆجا وەزیری تەندروستیی تورکیا لە هەژماری خۆیەوە لە تۆڕە کۆمەڵایەتییەکان بڵاوکردەوە، لە ئەنجامی ڕووداوێکی زنجیرەیی هاتووچۆدا لە شارۆچکەی ئانتاکیا کە بارهەڵگرێک و پاسێک گڕیان گرتووە، 12 کەس گیانیان لەدەستداوە و 31 کەسیش برینداربوون کە برینی سێیان سەختە. 22 ئەمبوڵانس و سێ تیمی ڕزگاریی پزیشکیی نیشتمانیی ڕەوانەی ناوچەکە کراون.

ئێوارەی دوێنێ لە ڕووداوێکی هاتووچۆدا لە هاتای کە بارهەڵگرێک خۆی بە بارهەڵگرێکی دیکەدا کێشا، چووە سایدی بەرامبەر و خۆی بە 11 ئۆتۆمبێلی دیکەدا کێشا، بەم هۆیەوەش دەیان کەس بوونە قوربانی.

ڕووداوەکە لەسەر ڕێگای سەرەکی ئیسکەندەرون ئانتاکیا ڕوویدا و تێیدا بارهەڵگرێک خۆی بە کرێنێکدا کێشا، شۆفێری بارهەڵگرەکە کۆنترۆڵی لەدەستداوە و چووەتە سایدی بەرامبەر، لەوێ خۆی کێشاوە بە نۆ ئۆتۆمبێل و دوو مینی پاسدا کە لە قەراغی ڕێگاکەدا وەستاون.