بەهۆی رووداوێکی هاتوچۆوە لە کینیا ٥١ کەس گیانیان لەدەستدا

پەیامی کورد... بەهۆی رووداوێکی هاتوچۆوە لە کینیا ٥١ کەس گیانیان لەدەستدا


پۆلیسی کینیا رایگەیاند، لە رووداوێکی هاتوچۆدا لەو وڵاتە ٥١ کەس گیانیان لەدەستدا و ٣٠ کەسیش برینداربوون.


ئەمڕۆ شەممە، پۆلیسی وڵاتی کینیا رایگەیاند، ئۆتۆمبێلێکی بارهەڵگر لەسەر رێگایەکی خێرا خۆی بە هەشت ئۆتۆمبێلی دیکەدا کێشاوە و بەهۆیەوە ٥١ کەس گیانیان لەدەستداوە و ٣٠ کەسیش بە سەختی برینداربوون.


ئەوەشخراوەتەڕوو، بارهەڵگرەکە کۆنترۆڵی لەدەستداوە و بەخێراییەکی زۆر رۆشتووە و لەو کاتەدا هەوڵیداوە کە خۆی لە رێگا سەرەکییەکە دوربخاتەوە و خۆی بەو ئۆتۆمبێل و ماتۆڕسکیلانەی قەراغ رێگاکەدا کێشاوە.


پۆلیس کینیا ئاماژەی بەوەش کردووە، رووداوەکە لە رێگای قەرەباڵغی نێوان کیریچۆ و ناکورو رویداوە کە رێگایەکی خێرایە و رووداوی هاتووچۆی بە بەردەوامی تێدا رودەدات.

ئەوە لە کاتێکدایە، دەسەڵاتی نیشتمانی گواستنەوە و سەلامەتی رایگەیاند، لە ساڵی رابردوودا لە کینیا چوار هەزار و ٦٩٠ کەس بەهۆی رووداوەکانی هاتوچۆوە گیانیان لەدەستداوە.