وەزارەتی ناوخۆ چەند بڕیارێکی لەبارەی داماڵینی چەک دەرکرد

پەیامی کورد... وەزارەتی ناوخۆ چەند بڕیارێکی لەبارەی داماڵینی چەک دەرکرد

وەزارەتی ناوخۆی حکومەتی هەرێمی کوردستان، چەند بڕیارێکی لەبارەی داماڵینی چەکی بێ مۆڵەتەوە دەرکرد و تێیدا باس لەوە کراوە: "١٢ بنکەی کۆکردنەوەی چەکی جەنگی لە پارێزگاکان و ئیدارە سەربەخۆکان دەکرێنەوە".

ئەمڕۆ یەکشەممە ٢٤/٧/٢٠٢٢، وەزارەتی ناوخۆی حکومەتی هەرێمی کوردستان ڕێنوێنییەکانی داماڵینی چەکی بێ مۆڵەتی بڵاو کردەوە و ئاماژە بەوە دەدات، ١٢ بنکەی کۆکردنەوەی چەکی جەنگی لە پارێزگاکان و ئیدارە سەربەخۆکان دەکرێنەوە و پێویستە هاووڵاتییانی هەرێمی کوردستان ئەو چەکە جەنگیانە ڕادەستی بکەن.

لە خاڵێکی دیکەدا هاتووە: "وەزارەتی ناوخۆ بە هەماهەنگی لەگەڵ وەزارەتی پێشمەرگە و ئاسایش، ١٢ لیژنە پێک دەهێنێت بە مەبەستی وەرگرتنەوەی چەکی جەنگی و تەقەمەنییەکان لە بنکەکانی وەرگرتن".

ئەوەش خراوەتە ڕوو، تۆمارکردنی چەکی ئاگرین وەک کڵاشینکۆف و هاوشێوەکانی کە قەبارەی فیشەکیان ٣٩ تا ٧. ٦٢ ملم زیاتر نەبێت و چەکی جۆری دەمانچە و تەقەمەنییەکانی کە قەبارەی فیشەکی لە ٩ ملم زیاتر نەبێت.

لە بەشێکی دیکەی ڕێنوێنییەکەدا، ڕوون کراوەتەوە: "وەزارەتی ناوخۆ ٤٠ بنکەی کۆکردنەوەی چەکی ئاگرین لە بەڕێوەبەرایەتییەکانی پۆلیس لە پارێزگا و ئیدارە سەربەخۆکان و بەشی پۆلیس لە قەزاکان دەکاتەوە بە مەبەستی تۆمارکردنی ئەو چەکانەی دیار کراون".